Հայաստանում բենզինի գները հասել են պատմական առավելագույնի

Հայաստանի լցակայաններում բենզինի մանրածախ գները սեպտեմբերի վերջին հասել են պատմական առավելագույնի, հայտնում է ՏԱՍՍ-ը։ Ըստ գործակալության՝ որոշ լցակայաններում ԱԻ-92 տեսակի բենզինի մեկ լիտրի գինը գերազանցել է 600 դրամը, իսկ ԱԻ-95-ինը՝ 620 դրամը։

Gulf ընկերության տվյալներով՝ իր լցակայաններում սովորական ԱԻ-92 բենզինի մեկ լիտրն արժե 599 դրամ, իսկ հավելանյութերով ԱԻ-95-ը՝ 629 դրամ։ Գների պատմական առավելագույնի մասին ՏԱՍՍ-ին հայտնել են նաև Flash Petrol և Max Oil ցանցերը։

Գների աճը ՏԱՍՍ-ը կապում է Հայաստան ռուսական բենզինի մատակարարումների նվազման և համաշխարհային շուկայում նավթամթերքի թանկացման հետ։ Գործակալության գնահատմամբ՝ միջազգային գների վրա ազդել են Մերձավոր Արևելքից էներգակիրների մատակարարումների խափանումները։