Ռուսաստանին հաղթել և ռուսաստանցիներին վախեցնել հնարավոր չէ․ Պուտին

Ռուսաստանին հաղթել և նրա քաղաքացիներին վախեցնել հնարավոր չէ, հաղթանակը Ռուսաստանինն է լինելու։ Այս մասին հայտարարել է ՌԴ նախագահ Վլադիմիր Պուտինը, փոխանցում է «ՌԻԱ Նովոստին»։

Պուտինը Կրեմլում հանդիպել է Պետդումայի ընտրությունների արդյունքներով խորհրդարան անցած քաղաքական կուսակցությունների ղեկավարների հետ։

«Մեր մարդիկ ամուր են, խիզախ, գրագետ, բոլորը շատ լավ հասկանում են, թե ինչ է կատարվում Ռուսաստանի շուրջ։ Եվ պարզ դարձավ, որ նման մարդկանց վախեցնել չի հաջողվի։ Նման մարդկանց և նման երկրին հաղթել հնարավոր չէ, հետևաբար հաղթանակն, անկասկած, մերը կլինի»,- հայտարարել է Պուտինը։

ՌԴ Պետդումայի 9-րդ գումարման ընտրություններն անցկացվել են սեպտեմբերի 18-20-ը։ Նոր գումարման կազմում ընտրվել են հինգ քաղաքական կուսակցությունների՝ «Եդինայա Ռոսիա»-ի, Կոմունիստական կուսակցության, ԼԴՊՌ-ի, «Նոր մարդիկ» և «Արդար Ռուսաստան» կուսակցությունների ներկայացուցիչներ, ինչպես նաև «Ռոդինա» կուսակցության մեկ ներկայացուցիչ և չորս ինքնառաջադրված թեկնածուներ։