Էրդողանին վիրավորելու մեջ մեղադրվող թուրք կատակերգուն ծիծաղեցրել է դատարանի դահլիճի ներկաներին

Թուրքիացի ստենդափ-կատակերգու Դենիզ Գեքթաշը, որը մեղադրվում է նախագահ Ռեջեփ Թայիփ Էրդողանին վիրավորելու և կրոնական արժեքները նվաստացնելու մեջ, առաջին դատական նիստի ընթացքում մի քանի անգամ ծիծաղ է առաջացրել ներկաների շրջանում։ Դրա մասին հայտնում է Halk TV հեռուստաալիքը։

Գեքթաշը 88 օր անցկացրել է Չորլուի խիստ ռեժիմի բանտում, որից հետո առաջին անգամ ներկայացել է դատարան։ Նիստի ընթացքում նա վստահ ելույթ է ունեցել և կատակել՝ չնայած իրեն առաջադրված մեղադրանքներին։

Դատարանը կատակերգուին ընդհանուր առմամբ դատապարտել է 18 ամիս ազատազրկման՝ 7 ամիս և 15 օր՝ կրոնական արժեքները նվաստացնելու համար, և 11 ամիս ու 20 օր՝ նախագահին վիրավորելու համար։ Միևնույն ժամանակ դատարանը որոշել է ազատ արձակել Գեքթաշին կալանքից։

Իր պաշտպանական խոսքում կատակերգուն պատմել է բանտում պահման պայմանների մասին։ Նա պատմել է, որ հուլիսի 3-ից ինքը մի խցում է, որտեղ արևի լույս չէր հասնում, և հնարավորություն չի ունեցել շփվելու մյուս կալանավորների հետ։ Ընտանիքի հետ հեռախոսազրույցների համար նրան թույլատրվում էր շաբաթական ընդամենը 10 րոպե։

Գեքթաշը հայտարարել է, որ քրեական հետապնդումն առնչվում է իր ստենդափ-շոուից վերցված չորս արտահայտություններին, որոնք նա երեք տարվա ընթացքում Թուրքիայի տարբեր քաղաքներում ելույթների ժամանակ արտասանել է մոտ 198 անգամ։ Կատակերգուի պատմելով՝ այդ ընթացքում հանդիսատեսը ոչ մի անգամ իր դեմ բողոք չի ներկայացրել։

Նա պնդում է նաև, որ ելույթի հատվածը YouTube-ում հրապարակվելուց հետո սոցիալական ցանցերում իր դեմ կազմակերպված արշավ է սկսվել։ Գեքթաշն ասել է, որ առանձին արտահայտություններ կտրվել են համատեքստից և ներկայացվել որպես կրոնական զգացմունքների վիրավորանք։

Կատակերգուն հայտնել է, որ գործի շրջանակում ներկայացվել է 185 բողոք։ Նա նշել է, որ հրապարակված տեսանյութը դիտել է մոտ 15 միլիոն մարդ, իսկ իր ելույթներին այդ ընթացքում ներկա է եղել մոտավորապես 100 հազար հանդիսատես։

Գեքթաշը հայտարարել է նաև, որ այն բանից հետո, երբ իմացել է սկսված քննության մասին, ինքնուրույն վերադարձել է Թուրքիա առաջին հասանելի չվերթով, թեև իրեն առաջարկել էին լքել երկիրը։

Կատակերգուին ձերբակալել էին հուլիսին՝ Ստամբուլի օդանավակայանում։ Ավելի վաղ նա հաստատել էր, որ Թուրքիայի նախագահ Ռեջեփ Թայիփ Էրդողանի քաղաքականության վերաբերյալ երգիծական նյութեր է հրապարակել։