«Վեհափառի հարցը չի կարող լուծվել իշխանության կամ քաղաքական ուժի միջոցով». Տեր Գաբրիել

Ամենայն Հայոց Կաթողիկոսի վերաբերյալ որևէ հարց չի կարող լուծվել աշխարհիկ իշխանության, քաղաքական խմբի, առանձին անհատի կամ փողոցային պահանջի միջոցով։ Այս մասին հայտարարել է Տեր Գաբրիել քահանա Վարդանյանը։

Նրա խոսքով՝ Հայ Առաքելական Սուրբ Եկեղեցում Ամենայն Հայոց Կաթողիկոսի ընտրության իրավասությունը պատկանում է Ազգային-Եկեղեցական Ժողովին։ Տեր Գաբրիելը նշել է, որ Կաթողիկոսի ընտրությունը չի կարելի նույնացնել խորհրդարանի, քաղաքական կուսակցության կամ որևէ աշխարհիկ կազմակերպության ընտրական գործընթացի հետ, քանի որ այն իրականացվում է աղոթքով և եկեղեցական կարգով։

Տեր Գաբրիելը ընդգծել է, որ Հայ Եկեղեցու կանոնական ավանդության համաձայն՝ Կաթողիկոսն ընտրվում է Ազգային-Եկեղեցական Ժողովով, ապա ձեռնադրվում և օծվում է։ Նրա խոսքով՝ այդ հանգամանքը Կաթողիկոսի ծառայությունը տարբերում է սովորական վարչական պաշտոնից։

Անդրադառնալով Գարեգին Բ Ամենայն Հայոց Կաթողիկոսին՝ Տեր Գաբրիելը նշել է, որ նա 1999 թվականի հոկտեմբերի 27-ին Ազգային-Եկեղեցական Ժողովում ընտրվել է Ամենայն Հայոց Կաթողիկոս, իսկ նոյեմբերի 4-ին ստացել է կաթողիկոսական ձեռնադրություն և օծում։

«Որևէ անհատ, խումբ, քաղաքական ուժ կամ պետական կառույց չի կարող իրեն վերապահել այն իրավասությունը, որը պատկանում է Եկեղեցու կանոնական մարմնին»,- ասել է Տեր Գաբրիելը՝ հավելելով, որ Կաթողիկոսի հարցը չի կարող լուծվել փողոցի, քաղաքական ճնշման կամ հասարակական պահանջի միջոցով։