Թաթա Սիմոնյանի թիմը պարզաբանել է 20 միլիոն դրամի պատմությունը․ «Խոսքը անձնական հոնորարի մասին չէ»

Երգիչ Թաթա Սիմոնյանի թիմը պարզաբանում է տարածել վերջին օրերին շրջանառվող տեղեկությունների վերաբերյալ, ըստ որոնց՝ նա պետական միջոցներից ստացել է 20 միլիոն դրամ անձնական հոնորար։

Թիմի հայտարարության համաձայն՝ այդ տեղեկությունը չի համապատասխանում իրականությանը։ 20 միլիոն դրամը նախատեսված է ամբողջ երաժշտական նախագծի իրականացման համար և չի հանդիսանում Թաթա Սիմոնյանին վճարված անձնական հոնորար։

Թիմից նշում են, որ գումարից արդեն շուրջ 2 միլիոն դրամ վճարվել է որպես հարկ, 2.6 միլիոն դրամ փոխանցվել է Հայաստանի պետական սիմֆոնիկ նվագախմբին, 1.39 միլիոն դրամ՝ «Levon Travel» ընկերությանը, շուրջ 2 միլիոն դրամ ուղղվել է նոտագրման, գործիքավորման, ձայնագրման և պարտիտուրաների ստեղծման աշխատանքներին։ Եվս 400 հազար դրամ կազմել է ստուդիայում ձայնային մշակման, իսկ մոտ 700 հազար դրամը՝ վարչական ծախսերի գումարը։

Ըստ թիմի՝ արդեն կատարված ծախսերը կազմում են շուրջ 9 միլիոն դրամ, իսկ բյուջեի մնացած մասը նախատեսված է Երևանին նվիրված տեսահոլովակի նկարահանման և դրա հետ կապված արտադրական աշխատանքների համար։ Հետագա վճարումների ընթացքում ևս նախատեսվում են համապատասխան հարկային պարտավորություններ։

Թիմը նաև ընդգծում է, որ ստեղծագործության հեղինակը Թաթա Սիմոնյանն է, սակայն որպես երգի հեղինակ նա առանձին հեղինակային հոնորար չի ստացել։

«Խոսքը մեկ ամբողջական երաժշտական նախագծի բյուջեի մասին է, ոչ թե Թաթա Սիմոնյանին վճարված 20 միլիոն դրամ անձնական հոնորարի»,- ասված է հայտարարության մեջ։