«Զզվելի հարվածներ են հասցրել»․ Զելենսկին՝ Ռուսաստանի նոր հարձակման մասին

Ուկրաինայի նախագահ Վոլոդիմիր Զելենսկին հայտնել է Ռուսաստանի կողմից Ուկրաինային հասցված նոր հարվածների մասին։

Նրա խոսքով՝ ռուսական ուժերը չորս ավիառումբ են կիրառել Սումիում՝ հարվածներ հասցնելով բնակելի հատվածին։

«Այսօր ռուսները բացարձակ զզվելի հարված հասցրին Սումիին՝ ուղղակի բնակելի կառուցապատմանը։ Եվ նրանք արդեն նույնիսկ չեն հորինում, թե ինչի համար են այդ հարվածները, չեն քողարկում դրանք։ Չորս ավիացիոն ռումբ»,- հայտարարել է Զելենսկին։

Ուկրաինայի նախագահի փոխանցմամբ՝ ավիառումբերից մեկը հարվածել է բնակելի շենքի, ինչի հետևանքով մեկ մարդ զոհվել է։

Մեկ այլ ռումբ հարվածել է սովորական դպրոցի։ Զելենսկին նշել է, որ հարվածի պահին դպրոցում երեխաներ են եղել։ Շենքը մեծ վնասներ է կրել, սակայն երեխաներն ու ուսուցիչները գտնվել են ապաստարանում, ինչի շնորհիվ դպրոցում տուժածներ չեն եղել։

Զելենսկին հայտնել է նաև, որ գիշերը Կիևը հերթական հարձակմանն է ենթարկվել բալիստիկ հրթիռներով և անօդաչու թռչող սարքերով։

«Կիևի ուղղությամբ գիշերը հերթական հարվածն էր բալիստիկ հրթիռներով և անօդաչուներով։ Կան խոցումներ։ Կարևոր է, որ բալիստիկ հրթիռ էլ է խոցվել»,- ասել է նա։

Նրա տվյալներով՝ օրվա սկզբից մինչև ժամը 18։00-ն Ուկրաինայի ուղղությամբ արձակվել է ավելի քան 100 անօդաչու։ Դրանցից 29-ը եղել են ռեակտիվ անօդաչուներ, որոնցից 18-ը խոցվել են։ Զելենսկու խոսքով՝ խոցվել է նաև սովորական «Շահեդների» մեծ մասը։

Ուկրաինայի նախագահը հայտնել է, որ այս շաբաթ նախատեսվում են նոր բանակցություններ՝ հակաօդային պաշտպանության և Ուկրաինային հետագա աջակցության հարցերով։

Զելենսկու խոսքով՝ նախօրեին Ուկրաինան ստացել է NASAMS հակաօդային պաշտպանության համակարգերի համար նախատեսված հրթիռների խմբաքանակ։

«Շատ լավ փաթեթ է։ Բոլոր գործընկերների հետ խոսում ենք, որպեսզի անհրաժեշտ հրթիռներ լինեն նաև «Պատրիոտների» համար»,- ասել է նա։

Զելենսկին հայտնել է նաև Բելգիայի՝ F-16 կործանիչների վերաբերյալ որոշման մասին։ Նրա խոսքով՝ Ուկրաինան այս տարի ևս երեք ինքնաթիռ կստանա։

Ուկրաինայի նախագահը նշել է, որ դրանք կամրապնդեն նաև երկրի օդային պաշտպանությունը, քանի որ մարտական ավիացիան ներկայում օգտագործվում է «Շահեդների» խոցման համար։

Զելենսկին շնորհակալություն է հայտնել նաև Եվրահանձնաժողովին և Եվրամիությանը՝ ֆինանսական աջակցության հերթական տրանշի վերաբերյալ որոշում նախապատրաստելու համար։

Նրա խոսքով՝ անցած շաբաթ Ուկրաինան զենքի համար ստացել է 3,3 միլիարդ եվրո, իսկ առաջիկա օրերին Բրյուսելից ակնկալում է ևս մեկ տրանշ՝ այս անգամ բյուջետային աջակցության համար։