Դուբայ-Թել Ավիվ չվերթի օդաչուները կռվել են․ օդաչուներից մեկը փորձել է դանակահարել մյուսին

Ըստ լրատվամիջոցների՝ Դուբայ-Թել Ավիվ չվերթն իրականացնող Flydubai ինքնաթիռի հրամանատարը եղել է Ռուսաստանի, իսկ մյուս օդաչուն՝ Ուկրաինայի քաղաքացի։ Թռիչքի ընթացքում նրանք վիճաբանել են և փոխադարձ հարվածներ հասցրել միմյանց, ինչին միջամտել են ուղևորները։

Ուղևորների խոսքով՝ նրանք լսել են ճիչեր և տեսել արյուն օդաչուների խցիկի մոտ։ Որոշ ուղևորներ պնդում են նաև, որ օդաչուներից մեկը փորձել է դանակահարել մյուսին։

Ինքնաթիռում եղել է 180 մարդ, որոնցից շուրջ 100-ը՝ Իսրայելի քաղաքացիներ։ Թռիչքի ընթացքում օդանավը կտրուկ նվազեցրել է բարձրությունը՝ մոտ 30 հազար ֆուտից իջնելով մինչև 15 հազար ֆուտ, ինչից հետո տրվել է վթարային ազդանշան։

Ինքնաթիռը, ի վերջո, վայրէջք է կատարել Սաուդյան Արաբիայի Թաբուկ քաղաքում։ Օդաչուներին ուղեկցել են ինքնաթիռից դուրս, իսկ հաղորդումների համաձայն՝ նրանք ձերբակալվել են Սաուդյան Արաբիայի իշխանությունների կողմից։ Ուղևորները սպասում են այլ չվերթով իրենց ճանապարհը շարունակելուն։