Այսօր Գևորգ Էմինի ծննդյան օրն է․ նա կդառնար 108 տարեկան

Այսօր՝ սեպտեմբերի 30-ին, լրանում է հայ անվանի գրող, բանաստեղծ և թարգմանիչ, ԽՍՀՄ պետական մրցանակի կրկնակի դափնեկիր Գևորգ Էմինի ծննդյան 108-րդ տարեդարձը։

Գևորգ Էմինը՝ Կառլեն Մուրադյանը, ծնվել է 1918 թվականի սեպտեմբերի 30-ին Աշտարակում։ 1940 թվականին ավարտել է Երևանի Կառլ Մարքսի անվան պոլիտեխնիկական ինստիտուտի հիդրոտեխնիկական ֆակուլտետը։ Ուսանողական տարիներին շփվել է Եղիշե Չարենցի հետ։

Էմինը տարբեր տարիների աշխատել է Մատենադարանում, «Լիտերատուրնայա գազետա»-ի հայաստանյան թղթակիցն է եղել, խմբագրել է «Լիտերատուրնայա Արմենիա» ամսագիրը, իսկ 1973 թվականից աշխատել է ՀԽՍՀ Արվեստի ինստիտուտում՝ որպես ավագ գիտաշխատող։

Նրա ստեղծագործական ժառանգության մեջ են «Նախաշավիղ», «Խաղաղության ծխամորճը», «Նորք», «Նոր ճանապարհ», «Որոնումներ», «Երևանի լույսերը», «Քսաներորդ դար», «Յոթ երգ Հայաստանի մասին», «Ելք Եգիպտոսից» և այլ ժողովածուներ։ Նրա ստեղծագործությունները թարգմանվել են բազմաթիվ լեզուներով։

Գևորգ Էմինը նաև թարգմանիչ էր․ հայերեն է թարգմանել տարբեր ազգերի հեղինակների ստեղծագործություններ, որոնցից լավագույններն ամփոփվել են «Գիրք թարգմանությանց» ժողովածուում։ Նրա սցենարով «Հայֆիլմը» նկարահանել է «Յոթ երգ Հայաստանի մասին» կինոնկարը։

Գևորգ Էմինը մահացել է 1998 թվականի հուլիսի 11-ին Երևանում։