Ինչ անել, եթե հարևաններն աղմկում են. մասնագետը ներկայացրել է լուծման տարբերակները

Աղմկոտ հարևանների խնդիրը նախ արժե փորձել լուծել զրույցով, իսկ եթե դա արդյունք չի տալիս՝ դիմել շենքը կառավարող ընկերությանը։ Այս խորհուրդը RT-ի հետ զրույցում տվել է Ռուսաստանի բնակարանային և կոմունալ տնտեսության հարցերով փորձագետ Դմիտրի Բոնդարը։

Ռուսաստանում, նրա խոսքով, բողոք կարելի է ներկայացնել նաև բնակարանային ծառայությունների պետական հավելվածով։ Բոնդարը խորհուրդ է տվել գրանցել աղմուկի յուրաքանչյուր դեպքը՝ նշելով ամսաթիվն ու ժամը, իսկ գիշերային աղմուկի դեպքում դիմել ոստիկանություն և մանրամասն հայտարարություն ներկայացնել տեղամասային ոստիկանին։ Ոստիկանության անգործության դեպքում նա առաջարկել է դիմել դատախազություն, բնակարանային տեսչություն կամ սպառողների իրավունքների պաշտպանության վերահսկող մարմին։

Փորձագետը նշել է, որ հնարավոր է նաև դատարան դիմել՝ բարոյական վնասի փոխհատուցում պահանջելով։ Այդ դեպքում կարևոր ապացույցներ կարող են լինել ձայնագրությունները, ոստիկանության կանչերի մասին տվյալները, հարևանների վկայություններն ու այլ փաստաթղթեր։