«Ոչ ոքի չեմ ստիպել մասնակցել նախընտրական հանդիպումներին»․ հետախույզ Արթուր Ավանեսյանի ցուցմունքը դատարանում

Հետախույզ Արթուր Ավանեսյանը դատարանում հայտարարել է, որ նախընտրական հանդիպումներին որևէ մեկին չի ստիպել մասնակցել։

«Կանդազ» մականունով հայտնի Ավանեսյանի խոսքով՝ պոտենցիալ աջակիցներին, այդ թվում՝ նախկին զինծառայողներին, տված բոլոր խոստումները ամբողջությամբ համապատասխանել են «Ուժեղ Հայաստան» կուսակցության նախընտրական ծրագրին։

Ծրագրում, մասնավորապես, նախատեսված են եղել Արցախի հայերին բնակարաններով ապահովելու, աշխատանքի տեղավորման և քաղաքացիների սոցիալ-տնտեսական պայմանների բարելավման վերաբերյալ դրույթներ։

Ի պատասխան այն մեղադրանքներին, թե իր հեղինակությունն ու ազդեցությունն օգտագործել է նախկին ծառայակիցների վրա ազդելու համար, Ավանեսյանը նշել է, որ եթե իսկապես նման ազդեցություն ունենար, ապա նրանք բոլորը կմիանային զինված ուժերի շարքերին։