Die Welt. ԵՄ 13 երկրներ կոչ են արել Եվրահանձնաժողովին վերանայել և պարզեցնել օրենքները

ԵՄ 13 երկրների իշխանությունները կոչ են արել Եվրոպական հանձնաժողովին (ԵՀ) «կարգավորիչ դադար» վերցնել՝ նոր օրենքներ և հրահանգներ ընդունելու փոխարեն վերանայել առկա օրենքները՝ դրանց անհրաժեշտության համար, պարզեցնել կամ նույնիսկ չեղյալ համարել դրանցից մի քանիսը։ Այս մասին հաղորդել է Die Welt թերթը՝ հղում անելով համապատասխան երկրների, այդ թվում՝ Ավստրիայի, Գերմանիայի և Իտալիայի կառավարությունների դեռևս չհրապարակված նամակին։

Հինգ էջանոց փաստաթղթում նշվում է, որ Բրյուսելը վերջապես պետք է ընդունի ավելի քիչ և պարզ օրենքներ՝ եվրոպական ընկերություններին ավելորդ բյուրոկրատիայից ազատելու և ԵՄ տնտեսության մրցունակությունը բարելավելու համար։

«Եվրոպայի մրցունակությունը գտնվում է աճող ճնշման տակ՝ աշխարհաքաղաքական լարվածության, կլիմայի փոփոխության, էներգակիրների բարձր գների, հումքից ռազմավարական կախվածության, երրորդ երկրներում արտադրական հզորությունների ավելցուկի և ներդրումների համար համաշխարհային մրցակցության պատճառով», - նշվում է նամակում։

«Այս առումով կարևոր է ապահովել կարգավորիչ միջավայր, որը կհեշտացնի ԵՄ-ում բիզնեսով զբաղվելը», - կարծում են 13 կառավարությունները։