Հայաստանն առաջին Գերազանցության մեդալն է նվաճել «WorldSkills Shanghai 2026» միջազգային մրցույթում

Չինաստանի Շանհայ քաղաքում ավարտված «Աշխարհի հմտություններ» (WorldSkills International) 48-րդ միջազգային մրցույթում Հայաստանը պատմության մեջ առաջին մեդալային նվաճումն է գրանցել։

Հայաստանի ազգային թիմը մրցույթին մասնակցել է երեք ուղղությամբ՝ «Խոհարարություն», «Բջջային հավելվածների պատրաստում» և «Նորաձևության տեխնոլոգիա»։ «Խոհարարություն» հմտության շրջանակում Երևանի մասնագիտական կրթության պետական քոլեջի շրջանավարտ Արսեն Արմենակյանը, փորձագետ-մարզիչ Արբի Ղարախանիի գլխավորությամբ, արժանացել է «Գերազանցության մեդալի»։

Արսեն Արմենակյանը նաև ստացել է Հայաստանի ազգային թիմի լավագույն մասնակցի «Best of Nation» մրցանակը։ Սա «Աշխարհի հմտություններ» մրցույթում Հայաստանի ազգային թիմի՝ մինչ այժմ վեց մասնակցության պատմության առաջին մեդալային արդյունքն է։

Բարձր արդյունքներ են գրանցել նաև թիմի մյուս անդամները։ «Բջջային հավելվածների պատրաստում» հմտության մասնակից Արամայիս Հայրապետյանին «Գերազանցության մեդալից» բաժանել է 14 միավոր, իսկ «Նորաձևության տեխնոլոգիա» հմտության մասնակից Լուիզա Զաքարյանին՝ 37 միավոր։

Հայաստանի ներկայացուցիչների ընտրությունն իրականացվել է ազգային մրցույթի արդյունքներով։ ԿԳՄՍՆ-ից նշում են, որ մասնակցությունը կարևոր է նաև միջազգային մասնագիտական համագործակցության, փորձի փոխանակման և մասնագիտական կրթության ոլորտում նոր մոտեցումների ուսումնասիրման տեսանկյունից։

Հայաստանը WorldSkills International-ի անդամ է 2012 թվականից՝ ի դեմս ՄԿՈՒ զարգացման ազգային կենտրոնի, որը համակարգում է անդամակցության հետ կապված աշխատանքները։ Մրցույթի շրջանակում անցկացվել է նաև մասնագիտական կրթության և ուսուցման ոլորտին նվիրված եռօրյա համաժողով, որի ընթացքում քննարկվել են հմտությունների զարգացումը, արհեստական բանականության ազդեցությունը կրթության վրա, աշխատաշուկայի փոփոխվող պահանջներն ու միջազգային համագործակցության ընդլայնումը։