Իրանը կանչել է Մեծ Բրիտանիայի դեսպանին՝ Fairford բազայի միջադեպին առնչություն ունենալու մեղադրանքների պատճառով

Իրանի արտգործնախարարությունը Թեհրանում Մեծ Բրիտանիայի դեսպան Հյուգո Շորթերին կանչել է Անգլիայում RAF Fairford ավիաբազայի մոտ ենթադրյալ դիվերսիայի փորձին Իրանի առնչության վերաբերյալ մեղադրանքների պատճառով, հաղորդում է IRIB-ը։

Իրանի արտգործնախարարի քաղաքական հարցերով տեղակալ Մաջիդ Թախտ-Ռավանչին բրիտանացի դիվանագետին Լոնդոնի մեղադրանքների դեմ «վճռական բողոք» է հայտնել և բացատրություններ պահանջել։

Ըստ իրանցի պաշտոնյայի՝ բրիտանական իշխանությունները պետք է ապացույցներ ներկայացնեն և վերանայեն Իրանի նկատմամբ իրենց անընդունելի մոտեցումը։ Թեհրանը հերքում է միջադեպին որևէ առնչություն ունենալը։

Սեպտեմբերի վերջին բրիտանական ոստիկանությունը RAF Fairford-ի՝ Իրանի դեմ գործողությունների համար ամերիկյան ռմբակոծիչների կողմից օգտագործվող բազայի մոտ ձերբակալել էր երկրի հինգ քաղաքացու։ Տղամարդիկ կասկածվում էին ահաբեկչական գործողություն նախապատրաստելու և պայթուցիկ նյութերի մասին օրենսդրությունը խախտելու մեջ։

Ավելի ուշ նրանց գրավի դիմաց ազատ են արձակել, սակայն հետաքննությունը շարունակվում է։ Ոստիկանությունը հայտնել է, որ խուզարկությունների ժամանակ կասկածյալների ավտոմեքենաներում բենզին է հայտնաբերվել, սակայն պայթուցիկ սարքեր չեն գտել։

Սեպտեմբերի 29-ին ԱՄՆ պետքարտուղար Մարկո Ռուբիոն հայտարարել է, որ միջադեպի հետևում կանգնած է օտարերկրյա սուբյեկտ, սակայն չի հստակեցրել, թե որ երկրի մասին է խոսքը։ Հաջորդ օրը Մեծ Բրիտանիայի վարչապետ Էնդի Բերնեմը հայտարարել է, որ կան Իրանի առնչության «ուժեղ նշաններ», սակայն ընդգծել է, որ հետաքննությունը շարունակվում է։ Թեհրանը ավելի վաղ կտրականապես մերժել էր նման ենթադրությունները։