Թրամփն իր վարչակազմին տվել է «A+» բարձր գնահատականը, թեև տնտեսական քաղաքականության հավանությունը ծարհահեղ նվազել է. AP

ԱՄՆ նախագահ Դոնալդ Թրամփն իր վարչակազմին տվեց ամենաբարձր գնահատականը՝ հայտարարելով, որ տնտեսության և այլ ոլորտներում նրա աշխատանքը արժանի է «A+»-ի։ Միաժամանակ, AP-NORC-ի նոր հարցումը ցույց է տալիս, որ ամերիկացիների շրջանում նրա տնտեսական քաղաքականության հավանության մակարդակը հասել է ռեկորդային նվազագույնի, գրում է Associated Press-ը։

«Կառավարության, տնտեսության, ամեն ինչի համար մեզ տալիս եմ A-պլյուս», — հինգշաբթի Սպիտակ տանը լրագրողներին ասել է Թրամփը։

Նա հայտարարել է, որ գնաճի մակարդակն այժմ «շատ լավ» է, և կանխատեսել է նավթի գների հետագա նվազում։

Սակայն, ըստ Associated Press-NORC Center for Public Affairs Research-ի հարցման, Թրամփի աշխատանքը տնտեսության ոլորտում հավանում է չափահաս ամերիկացիների միայն 26%-ը, ինչը նոր նվազագույն է։ Միայն 17%-ն է հավանում նրա գործողությունները կենսապահովման արժեքի հարցում։ Ընդ որում, հարցվածների 65%-ը կարծում է, որ բարձր գներն ավելի շատ կապված են հենց Թրամփի քաղաքականության հետ, քան նրա վերահսկողությունից դուրս գտնվող գործոնների։

Հարցումն անցկացվել է սեպտեմբերի 24-28-ը ԱՄՆ 2140 չափահաս բնակիչների շրջանում։

Թրամփը բարձր գնահատեց իր աշխատանքը այն բանից հետո, երբ լրագրողները հարցրին վերջին բողոքների մասին, թե իր վարչակազմի ձեռքբերումները բավարար ուշադրության չեն արժանանում։

Նախօրեին նախագահը հայտարարել էր, որ վարչակազմը, իր կարծիքով, «ծայրահեղ վատ» է զբաղվում սեփական ձեռքբերումների առաջմղմամբ՝ միաժամանակ «ծայրահեղ լավ ղեկավարելով երկիրը»։

Այս ֆոնին Թրամփը մտադիր է ավելի ակտիվորեն առաջ մղել իր աշխատանքի արդյունքները նոյեմբերյան միջանկյալ ընտրություններից առաջ։ Նոր հարցումը ցույց է տալիս, որ կենսապահովման արժեքի և տնտեսության վիճակի հարցերը ամերիկացիների համար շարունակում են մնալ նրա գործունեության գնահատման ամենախնդրահարույց ուղղություններից։