Ոչ սթափ վիճակում վարած Opel-ը բախվել է Honda-ին․ մեքենան հրդեհվել է

Հոկտեմբերի 1-ին՝ ժամը 21:20-ի սահմաններում, ավտովթար-հրդեհ է տեղի ունեցել Արագածոտնի մարզում՝ Փարպի բնակավայրից դեպի Աշտարակ տանող ճանապարհի 1-ին կմ հատվածում։

Բախվել են Կոտայքի մարզի բնակիչ, 40-ամյա Արտակ Գ.-ի վարած «Opel»-ը և Արագածոտնի մարզի բնակիչ, 51-ամյա Սամվել Ն.-ի վարած «Honda»-ն։

Վթարի հետևանքով «Opel»-ի վարորդը տեղափոխվել է «Աշտարակ» բժշկական կենտրոն։ Բախումից հետո «Opel»-ում հրդեհ է բռնկվել։ Մինչ փրկարարների ժամանումը՝ կրակի դեմ պայքարել են «Honda»-ի վարորդն ու քաղաքացիները, այնուհետև հրշեջ-փրկարարները մարել են հրդեհը։ «Opel»-ը դարձել է ոչ շահագործելի։

Դեպքի առթիվ նյութեր են փոխանցվել Քննչական կոմիտեի Արագածոտնի մարզային քննչական վարչություն։ Քննիչի հանձնարարությամբ ավտոմեքենաները տեղափոխվել են Աշտարակի ոստիկանության բաժնի պահպանվող հատուկ տարածք։

Ըստ ֆոտոլրագրող Գագիկ Շամշյանի տեղեկությունների՝ «Opel»-ի վարորդը եղել է ոչ սթափ վիճակում, ինչի հետևանքով մեկ տարով զրկվել է ավտոմեքենա վարելու իրավունքից։