Վան Գոգի մեկ կտավը՝ $180 միլիոն․ Sotheby's-ը աճուրդի է հանում բացառիկ հավաքածու

Վինսենթ վան Գոգի, Պոլ Սեզանի և Կլոդ Մոնեի ստեղծագործություններ ներառող 12 կտավներից բաղկացած հավաքածուն նոյեմբերին Նյու Յորքում կայանալիք աճուրդում կարող է վաճառվել մոտ 450 մլն դոլարով։ Հավաքածուից հինգ կտավ չորեքշաբթի ներկայացվել է Լոնդոնի «Sotheby's»-ում։ Դրանց թվում են Սեզանի «Արլեկինը» և Մոնեի «Թյուիլրիի այգին»։ Հավաքածուի մյուս գործերը ներկայացվում են թվային ձևաչափով։

Վան Գոգի «Ծաղկած շագանակենիները» կտավը գնահատվում է մոտ 180 մլն դոլար։ Այն ստեղծվել է նկարչի կյանքի վերջին շրջանում՝ Օվեր-սյուր-Ուազում, հոգեբուժական կլինիկայից դուրս գալուց հետո։ «Sotheby's Europe»-ի նախագահ Հելենա Նյումանը հավաքածուն անվանել է աճուրդում երբևէ ներկայացված ամենաթանկարժեք հավաքածուներից մեկը։ Նրա խոսքով՝ Վան Գոգի և Սեզանի աշխատանքները կարող են ռեկորդային գներ գրանցել։

Սեզանի «Արլեկինը», որը հանրության համար չի ցուցադրվել 1975 թվականից, գնահատվում է մոտ 120 մլն դոլար։ «Sotheby's»-ը ակնկալում է, որ այն կարող է նոյեմբերին սահմանել նկարչի աշխատանքների վաճառքի նոր աճուրդային ռեկորդ։ Հավաքածուի մեծ մասը 1970-ականներին Լոնդոնում ձեռք են բերել Կառլոս Պեդրո Բլակյեն և Նելլի Բլակյեն դե Արրիետան։ Շատ կտավներ շուրջ կես դար կամ ավելի չեն ցուցադրվել հանրությանը։ Հավաքածուի հիմնական աճուրդը կկայանա Նյու Յորքում՝ նոյեմբերի 18-ին։