Արմեն Այվազյանը քննադատել է ՀՀ աղոթքի նախաճաշի միջոցառումը

Քաղաքական գիտությունների դոկտոր, պատմաբան Արմեն Այվազյանը քննադատել է Հայաստանի Հանրապետության աղոթքի երկրորդ նախաճաշի շրջանակում կազմակերպված միջոցառումը՝ նշելով, որ միջոցառման վայրում հայերեն գրություններ չեն եղել, իսկ պաստառները եղել են անգլերեն։

Այվազյանը միջոցառումը գնահատել է որպես «աղանդավորական» և պնդել, որ դրանով ՀՀ իշխանությունները արհամարհում են պետական լեզվի, ազգային ինքնիշխանության և Հայ Առաքելական Եկեղեցու նկատմամբ հարգանքի սկզբունքները։

Միջոցառմանը, ըստ ՀՀ կառավարության տարածած հաղորդագրության, մասնակցել է վարչապետ Նիկոլ Փաշինյանը։ Ներկա են եղել նաև Հայաստանից և արտերկրից բարձրաստիճան պաշտոնյաներ, պետական, դիվանագիտական, գործարար և հոգևոր ոլորտների ներկայացուցիչներ։

Միջոցառման ընթացքում ելույթներ են ունեցել ԱՄՆ պետքարտուղարության ներկայացուցիչ Ռիլեյ Բարնսը, ԱՄՆ Միջազգային կրոնական ազատությունների հարցերով հանձնաժողովի ղեկավար Ասիֆ Մահմուդը և «Աշխարհիկ մարդկանց հոգևոր ակումբ» ՀԿ նախագահ Ստեփան Սարգսյանը։

Ընթրիքը մեկնարկել է աղոթքով, որը հնչեցրել է Հայաստանի, Վրաստանի, Ռուսաստանի և Արևելյան Եվրոպայի Կաթողիկե Հայոց առաջնորդ Տեր Գևորգ Արքեպիսկոպոս Նորատունկյանը։

Նիկոլ Փաշինյանն իր ելույթում նշել է, որ իր ընկալմամբ՝ սա ձևաչափ է, որտեղ մարդիկ ազատ են խոսելու Աստծո, իրենց հոգևոր ընկալումների և պատմությունների մասին։