ԱԱԾ-ն գիտեր, որ ադրբեջանցի զինվորը Հայաստանում է, բայց չգտա՞վ նրան․ «Փաստ»

«Փաստ» օրաթերթն անդրադարձել է Սյունիքի Շաքի բնակավայրում ադրբեջանցի զինծառայողի հայտնվելու և ՀՀ քաղաքացուն հրազենով վիրավորելու դեպքին՝ հարց բարձրացնելով, թե ինչպես է զինված անձը հասել բնակավայր և ինչու է հայտնաբերվել միայն տեղի ունեցած կրակոցից հետո։

Ըստ պաշտոնական տվյալների՝ սեպտեմբերի 29-ին Ադրբեջանի Պետական անվտանգության ծառայությունը ՀՀ ԱԱԾ-ին հայտնել էր, որ ադրբեջանական զորամասերից մեկի զինծառայողը լքել է ծառայության վայրը, և չէր բացառվում, որ նա ապօրինի հատած լիներ Հայաստանի սահմանը։ Դրանից հետո հայկական և ադրբեջանական իրավասու մարմինները որոնողական աշխատանքներ են իրականացրել։ 

Հոկտեմբերի 1-ին՝ ժամը 14։17-ին, 112 օպերատիվ կառավարման կենտրոն ահազանգ է ստացվել, որ Շաքիում զինված անձը կրակել է տան բնակչի ոտքին։ Ոստիկանության տարբեր ստորաբաժանումների գործողությունների արդյունքում պարզվել է, որ կրակողը հենց որոնվող ադրբեջանցի զինծառայողն է։ Նա հայտնաբերվել և ձերբակալվել է։ 

«Փաստը» հրապարակման մեջ քննադատական հարցադրումներ է անում՝ մասնավորապես՝ ինչպե՞ս է զինված անձը կարողացել աննկատ հասնել բնակավայր, և ինչո՞ւ նախազգուշացումից հետո նրան չեն հայտնաբերել մինչև տեղի ունեցած միջադեպը։ Թերթը այս հանգամանքները կապում է նաև ԱԱԾ-ի և ոստիկանության աշխատանքի արդյունավետության հետ։

Միաժամանակ, պաշտոնական հաղորդագրություններում նշվում է, որ որոնողական աշխատանքներ իրականացվել են դեռևս սեպտեմբերի 29-ից, իսկ հոկտեմբերի 1-ին ահազանգից հետո իրավապահների ձեռնարկած անհետաձգելի միջոցառումների արդյունքում զինծառայողը հայտնաբերվել է։ 

Դեպքի առնչությամբ նախաձեռնվել են քրեական վարույթներ՝ ՀՀ քաղաքացուն զենքի գործադրմամբ վնաս պատճառելու, հրազենի ապօրինի շրջանառության, բնակարանի անձեռնմխելիությունը խախտելու, ինչպես նաև պետական սահմանն ապօրինի հատելու և հրազենի մաքսանենգության դեպքերով։ 

Հոկտեմբերի 3-ի դրությամբ ադրբեջանցի զինծառայող Նասիմի Ռահիմ Օղլի Մուսաևը երկու ամսով կալանավորվել է։