Նապոլեոնի՝ ավելի քան 200 տարվա գաղտնագրված նամակը AI-ն վերծանել է 6 ժամում

Նապոլեոն Բոնապարտի՝ 1809 թվականին գեներալ Օգյուստ դը Մարմոնին ուղարկած գաղտնագրված նամակը, որի բովանդակությունը ավելի քան 200 տարի չէր հաջողվում վերծանել, արհեստական բանականության միջոցով բացահայտվել է մոտ վեց ժամում։

Նամակը վերծանել է SentinelOne ընկերության արհեստական բանականության ինժեներ և կիբերանվտանգության մասնագետ Քարթեր Չերչը՝ GPT-6 Astra համակարգի օգնությամբ։ Այդ մասին նա հայտնել է իր բլոգում։

Նամակը վերաբերում էր 1809 թվականին Ավստրիայի դեմ պատերազմի նախօրեին ֆրանսիական զորքերի տեղակայմանն ու թվաքանակին։ Նապոլեոնը նաև նախազգուշացնում էր դը Մարմոնին հնարավոր ավստրիական հարձակման մասին և կոչ էր անում չվախենալ հակառակորդի ուժերից։

Նամակը գրված էր հոմոֆոնիկ ծածկագրով, որի դեպքում նույն տառը կարող է ներկայացվել տարբեր նշաններով։ GPT-6 Astra-ն ճանաչել է 175 ձեռագիր նշան և փորձարկելով դրանց հնարավոր նշանակությունները՝ վերականգնել ամբողջական ու տրամաբանական տեքստը։

Նամակի պատճենը դեռևս 1969 թվականին հրապարակվել էր ֆրանսիական բանակի ամսագրում, իսկ Չերչը այն հայտնաբերել էր պատմական գաղտնագրերին նվիրված Cryptiana բլոգում։

Նամակում Նապոլեոնը, մասնավորապես, գրել էր. «Երբ ստանաք առաջ շարժվելու հրամանը, թույլ մի տվեք, որ ձեզ վախեցնեն մի քանի զինվորական ստորաբաժանումներ կամ խաժամուժի մի բազմություն»։

1809 թվականի պատերազմից հետո դը Մարմոնը միացավ Նապոլեոնի հիմնական ուժերին և մասնակցեց ռազմական արշավի վերջին խոշոր ճակատամարտին։ Հաղթանակից հետո Նապոլեոնը նրան նշանակեց մարշալ։