Կարեն Սաֆարյանը խոշոր ներդրումներ է անում Վրաստանում․ ի՞նչ կապ ունի Ռոբերտ Քոչարյանն այս ամենի հետ

Այս տարվա օգոստոսի 25-ին հայտնի դարձավ, որ լյուքսեմբուրգյան AGE S.A. ընկերությունը պայմանավորվածություն է ձեռք բերել վրացական Terabank-ի բաժնետոմսերը գնելու վերաբերյալ։ Նույն գործարքի շրջանակում նախատեսվում է նաև Թբիլիսիի «Biltmore» հյուրանոցի ձեռքբերումը։ AGE S.A.-ն «Արինս Գրուպի» ֆինանսական էկոհամակարգի մաս է, որի կազմում գործում է նաև հայկական «Արդշինբանկ» ԲԲԸ-ն։ Գործարքը ներկայացվում է որպես խմբի միջազգային ընդլայնման հերթական քայլ։ 

Ըստ հրապարակված տվյալների՝ Terabank-ն ակտիվների ծավալով Վրաստանի վեցերորդ խոշոր բանկն է։ 2026 թվականի հուլիսի դրությամբ բանկի համախառն ակտիվները կազմել են 2,27 միլիարդ լարի՝ շուրջ 316 միլիարդ դրամ։ Իսկ «Biltmore Tbilisi» հյուրանոցի հաշվեկշռային արժեքը կազմում է մոտ 29,4 միլիարդ դրամ։ Այս ցուցանիշները, սակայն, չեն արտացոլում ակտիվների ձեռքբերման գինը։ Այսպիսով՝ «Արդշինբանկի» հետ նույն խմբում ընդգրկված ընկերությունը նախատեսում է խոշոր ակտիվներ ձեռք բերել Հայաստանի սահմաններից դուրս։ 

Այս գործարքի համատեքստում կրկին առաջ է գալիս տարիներ շարունակ մամուլում շրջանառվող հարցը՝ ՀՀ երկրորդ նախագահ Ռոբերտ Քոչարյանի և «Արդշինբանկի» միջև ենթադրյալ կապերի վերաբերյալ։ Բանկի խորհրդի նախագահն ու վերջնական շահառուն Կարեն Սաֆարյանն է, որի և Ռոբերտ Քոչարյանի միջև, ըստ շրջանառվող լուրերի, առկա են սերտ անձնական հարաբերություններ։ 

Այս ամենին զուգահեռ, Euromedia24-ին տեղեկություններ են հասել այն մասին, որ Ռոբերտ Քոչարյանը, Հայաստանում ստեղծված ներքաղաքական իրավիճակով և իր նկատմամբ իրականացվող ճնշումներով պայմանավորված, փորձում է իր կապիտալն ու բիզնես շահերը տեղափոխել արտերկիր։ Այդ համատեքստում առաջ է քաշվում նաև վարկած, թե վրացական ակտիվների ձեռքբերումը կարող է առնչություն ունենալ նման գործընթացի հետ։ Այս տեղեկությունները ճշտելու  նպատակով, Euromedia24-ը գրավոր հարցում է ուղարկել «Արդշինբանկ» ԲԲԸ-ին։ Ի պատասխան մեր հարցման՝ բանկը հայտնել է․ 

«Արդշինբանկը բազմիցս պաշտոնապես հերքել է մամուլում շրջանառվող նմանաբովանդակ տեղեկատվությունը, Ձեզ ենք ներկայացնում Բանկի պաշտոնական կայքում 2018 և 2020 թվականին հրապարակված հերքման հղումները։ Այս տեղեկատվությունը հաստատելու համար Բանկը պատրաստ է տրամադրել ՀՀ Կենտրոնական դեպոզիտարիայից համապատասխան տեղեկանք Բանկի բաժնետերերի (մասնակիցների) վերաբերյալ»։ 

Euromedia24-ին հետաքրքրող հաջորդ հարցը կապիտալի ծագումն է․ որտեղի՞ց են փոխանցվել կամ փոխանցվելու գործարքի ֆինանսավորման միջոցները։ Դրանք Հայաստանում վաստակած գումարնե՞ր են, թե՞ արտերկրում գործող ձեռնարկությունների միջոցներ, որոնք, հնարավոր է, պատկանում են պարոն Սաֆարյանին։ Եթե խոսքը Հայաստանում ձևավորված և երկրից դուրս ուղղվող կապիտալի մասին է, ապա «Արդշինբանկի» խորհրդի նախագահ Կարեն Սաֆարյանին ուղղված հարցը մնում է բաց․ որքանո՞վ է հիմնավորված երկրի համար այս բարդ իրավիճակում նման ծավալի ներդրում կատարել Վրաստանում՝ նպաստելով հարևան երկրի տնտեսության զարգացմանը, երբ սեփական երկրի տնտեսությունն ինքն ունի ներդրումների կարիք։ Այս և մի շարք այլ հարցերի պատասխանները Euromedia24-ը կփորձի առաջիկայում ստանալ Կարեն Սաֆարյանից։