Գերմանիան Ուկրաինային լրացուցիչ 1 մլրդ եվրոյի ռազմական օգնություն կտրամադրի․ Մերց

Գերմանիայի կանցլեր Ֆրիդրիխ Մերցը Կիև կատարած այցի ընթացքում հայտարարել է, որ Գերմանիան շարունակելու է աջակցել Ուկրաինային՝ այդ թվում տրամադրելով լրացուցիչ 1 մլրդ եվրոյի ռազմական օգնություն։

Մերցը Ուկրաինայի նախագահ Վոլոդիմիր Զելենսկու հետ այցելել է պատերազմի հետևանքով զոհված զինվորների հուշահամալիր, ինչպես նաև Գիտությունների ակադեմիա, որը նախորդ շաբաթ ենթարկվել էր անօդաչու սարքի հարվածի։

Համատեղ մամուլի ասուլիսի ժամանակ Մերցը հայտնել է նաև Ուկրաինայի էներգետիկ ոլորտի վերականգնման համար 350 մլն եվրո հատկացնելու մասին։

Կանցլերի խոսքով՝ Գերմանիան աջակցում է Ուկրաինային ոչ միայն նրա տարածքային ամբողջականությունը պաշտպանելու, այլև Եվրոպայի անվտանգությունն ապահովելու նպատակով։

Մերցի հետ Կիև այցելած գերմանական ընկերությունների ղեկավարները Ուկրաինայի կառավարության և գործարարների հետ ստորագրել են 14 համաձայնագիր՝ շուրջ 6,6 մլրդ եվրո ընդհանուր արժեքով։

Մասնավորապես, Ուկրաինան գերմանական Diehl Defence ընկերությունից կստանա IRIS-T հակաօդային պաշտպանության հրթիռներ, իսկ Hensoldt-ից՝ ռադարային սարքավորումներ։ Quantum Systems ընկերության հետ էլ պայմանավորվածություն է ձեռք բերվել ռեակտիվ անօդաչու սարքեր որսացող համակարգերի մատակարարման վերաբերյալ։

Զելենսկին հայտնել է, որ Ուկրաինան և Գերմանիան մոտ են լայնածավալ պաշտպանական համաձայնագրի վերջնականացմանը։ Նրա խոսքով՝ այն նախատեսում է անօդաչու սարքերի, հրթիռների և համապատասխան ծրագրային ապահովման համատեղ արտադրություն։