ՄՄԿ-ն և ՀՀ նախարարությունը քննարկել են միգրացիոն տվյալների կառավարման բարելավումը

ՀՀ բարձր տեխնոլոգիական արդյունաբերության և արհեստական բանականության նախարարի տեղակալներ Գևորգ Մանթաշյանն ու Տաթև Ասլանյանն ընդունել են Միգրացիայի միջազգային կազմակերպության (ՄՄԿ) հայաստանյան գրասենյակի ղեկավար Իլոնա Տեր-Մինասյանի գլխավորած պատվիրակությանը։

Հանդիպումն անցկացվել է ՄՄԿ-ի կողմից իրականացվող և ՄՄԿ Զարգացման հիմնադրամի ֆինանսավորմամբ իրականացվող ծրագրի շրջանակում, որի նպատակն է Հայաստանում միգրացիոն տվյալների կառավարման համակարգի զարգացումն ու արդիականացումը։

Քննարկվել են համակարգը ԵՄ և միջազգային չափանիշներին համապատասխանեցնելու, ինչպես նաև տվյալների կառավարման գործընթացներում ժամանակակից տեխնոլոգիաների և արհեստական բանականության կիրառման հնարավորությունները։

Անդրադարձ է կատարվել նաև իրավական, ինստիտուցիոնալ և տեխնիկական բացերին, պետական մարմինների միջև տվյալների փոխգործունակությանը, տեղեկատվական համակարգերի ինտեգրմանն ու տվյալների որակի բարելավմանը։