Կրեմլը մեկնաբանել է Ռուսաստանում ժանտախտի մասին լուրերը

Կրեմլի պաշտոնական ներկայացուցիչ Դմիտրի Պեսկովը կոչ է արել Իրկուտսկի մարզում ստեղծված իրավիճակի վերաբերյալ առաջնորդվել միայն պաշտոնական հայտարարություններով և չվստահել չհաստատված տեղեկություններին։ Նա այսպես է մեկնաբանել Սիբիրում և Հեռավոր Արևելքում ժանտախտի դեմ պայքարի ինստիտուտի աշխատակցուհու վարակվելուց հետո տարածված լուրերը։ Պեսկովի խոսքով՝ այս հարցում իրավասու գերատեսչությունը Ռոսպոտրեբնադզորն է։

Ռոսպոտրեբնադզորը հայտնել էր, որ հակաժանտախտային ինստիտուտում ախտածին միկրոօրգանիզմների հետ աշխատանքի ընթացքում որևէ վթար չի արձանագրվել։ Գերատեսչության մասնագետները նաև իրականացրել են լրացուցիչ հետազոտություններ, որոնց արդյունքում հիվանդից վերցված նյութում չեն հայտնաբերվել նրա մասնագիտական գործունեության հետ կապված միկրոօրգանիզմներ։

Հոկտեմբերի 2-ին հայտնի էր դարձել, որ Իրկուտսկի մարզի հակաժանտախտային ինստիտուտի աշխատակցուհին մահացել է թոքային ժանտախտից վարակվելուց հետո։ Նախնական տվյալներով՝ հիվանդանալուց առաջ նա գործուղման էր եղել Բուրյաթիայում։ Միևնույն ժամանակ, իշխանությունները պաշտոնապես չեն հաստատել, որ կնոջ մոտ ժանտախտ է եղել․ Ռոսպոտրեբնադզորը հայտնել էր, որ նրա մոտ ախտորոշվել էր անհայտ ծագման թոքաբորբ։