Շաքիում ադրբեջանցի զինծառայողի կրակոցից վիրավորված կնոջը 3 բարդ վիրահատություն է սպասվում․ քույրը մանրամասներ է հայտնել

Բժիշկների խոսքով՝ Շաքիում ադրբեջանցի զինծառայողի կրակոցից վիրավորված Անի Ավետիսյանի վիճակը ներկայում կայուն է։ Նրան ցավազրկողներ են տալիս, իսկ առաջիկայում նախատեսվում է երեք բարդ վիրահատություն։

Անիի քույրը՝ Արփի Ավետիսյանը, NEWS.am-ի հետ զրույցում հայտնել է, որ վիրավոր կնոջ ազդրի հատվածից հեռացվել է մոտ 8 սմ վնասված ոսկոր, մաքրվել են բեկորներն ու փշրված ոսկորները՝ վարակը կանխելու համար։ Վնասված են նաև ծունկն ու ջլերը։

Բժիշկները ներկայում առաջնահերթ համարում են ոտքը փրկելը։ Նշվում է, որ հետագայում՝ մոտ 8 ամիս անց, ևս մեկ վիրահատություն է անհրաժեշտ լինելու, և ոտքը կարող է 8 սմ-ով կարճանալ։

Արփի Ավետիսյանի խոսքով՝ Անիի գիտակցությունը տեղում է, սակայն նա ծանր հոգեբանական վիճակում է և կրկին ու կրկին պատմում է տեղի ունեցածի մասին։

Նա նաև մանրամասներ է ներկայացրել դեպքի մասին՝ նշելով, որ ադրբեջանցի զինծառայողը ներխուժել էր տուն, որտեղ երեխաներն էին։ Նրա խոսքով՝ 12-ամյա աղջիկը և 15-ամյա տղան ներկայում ծանր հոգեբանական վիճակում են։ Տղան ևս վիրավորվել էր, նրա դաստակը կոտրվել է։

Ավելի վաղ հաղորդվել էր, որ հոկտեմբերի 1-ին Ադրբեջանի զինծառայող Նասիմի Մուսաևը ապօրինի մուտք է գործել Սյունիքի մարզի Շաքի բնակավայրի բնակելի տուն և կրակոցներ արձակել։ Դեպքի հետևանքով վիրավորվել է 1987 թվականին ծնված Անի Ավետիսյանը։ Մուսաևը ձերբակալվել և երկու ամսով կալանավորվել է։