Գերմանիան կարող է ուղիղ բախման մեջ մտնել Ռուսաստանի հետ

Գերմանիայի Դաշնային հետախուզական ծառայության նախագահ Մարտին Եգերի գնահատմամբ՝ Ռուսաստանի հետ ուղիղ ռազմական բախման վտանգն աճել է։ Խորհրդարանական վերահսկողության հանձնաժողովի առջև անցկացված հրապարակային լսումների ժամանակ Եգերը հայտարարել է. «Ռուսաստանի հետ այն հակամարտությունը, որի մեջ մենք գտնվում ենք, նոր, ավելի վտանգավոր բնույթ է ստացել․ Գերմանիան վտանգում է հայտնվել Ռուսաստանի հետ զինված հակամարտության մեջ։ Ներկայում որևէ այլ երկրից Գերմանիային այսքան ուղիղ, համապարփակ և կոնկրետ վտանգ չի սպառնում», գրում է Bild-ը։

Եգերը պնդում է, որ ռուսական հատուկ ծառայությունները Եվրոպայում գործում են «բարձր պրոֆեսիոնալությամբ և անխղճորեն», և նոր դիվերսիաների վտանգը պահպանվում է։ Ի վերջո, Ռուսաստանի ղեկավարությունը ցանկանում է «երաշխավորել, որպեսզի Բեռլինում և եվրոպական այլ մայրաքաղաքներում Մոսկվայի դեմ քաղաքական որոշումներ չընդունվեն», նշել է գերմանական հետախուզության ղեկավարը։

«Գերմանիան դարձել է Եվրոպայում ռուսական հեգեմոնիկ ուժի պրոյեկցիայի գլխավոր խոչընդոտը և այդպիսով՝ Ռուսաստանի գործողությունների թիրախը։ Ով չի ենթարկվում, դառնում է հակառակորդ․ այդպիսին է Մոսկվայի տեսլականը։ Ռուսաստանը մեր դեմ ստվերային պատերազմ է վարում։ Այս չհայտարարված պատերազմը չի տեղավորվում սովորական ռազմական կամ իրավական կատեգորիաների մեջ։ Մենք պաշտպանության վիճակում չենք, բայց ենթարկվում ենք հարձակման, և հենց այդ պատճառով սա ստվերային հակամարտություն է»,- նշել է Եգերը։

Հետախուզությունը ներկայում ՆԱՏՕ-ի դեմ ուղիղ լայնածավալ ռազմական հարձակման սպառնալիք չի տեսնում։ Սակայն Եգերը զգուշացնում է Ռուսաստանի հնարավոր «ցածր ինտենսիվության ռազմական ակտիվության» մասին, հատկապես Բալթյան երկրներում։

«Մենք պետք է պատրաստվենք վախեցնելու փորձերին և հետագա միջամտությանը։ Հավանաբար կրկին կլինեն նաև միջուկային սպառնալիքներ»,- նշել է նա։