Վիճաբանություն և ծեծկռտուք՝ Արագածոտնի մարզի Ոսկեվազ գյուղի դաշտերում. կան վիրավորներ

Սեպտեմբերի 28-ին մի խումբ անձանց մասնակցությամբ վիճաբանություն և ծեծկռտուք է տեղի ունեցել Արագածոտնի մարզում։ Ժամը 01:20-ի սահմաններում ոստիկանության քրեական ոստիկանության գլխավոր վարչության Արագածոտնի մարզային վարչությունում օպերատիվ տեղեկություններ են ստացվել, որ Ոսկեվազ բնակավայրում վիճաբանություն և ծեծկռտուք է տեղի ունեցել, կան վիրավորներ, այդ թվում՝ դանակահարվածներ։

Դեպքի վայր է մեկնել քրեական ոստիկանության գլխավոր վարչության Արագածոտնի մարզային վարչության օպերատիվ խումբը՝ վարչության պետի ժամանակավոր պաշտոնակատարի գլխավորությամբ։

Տեղում պարզվել է, որ ստացված տեղեկությունները համապատասխանում են իրականությանը։ Բացի այդ, ոստիկանները պարզել են, որ վիճաբանության և ծեծկռտուքի հետևանքով «Աշտարակ» բժշկական կենտրոն են տեղափոխվել Արագածոտնի մարզի բնակիչ 32-ամյա Դավիթ Հ.-ն և Երևանի բնակիչ 36-ամյա Տիգրան Մ.-ն։

Ոստիկանների մեկ այլ խումբ մեկնել է բժշկական կենտրոն, որտեղ պարզվել է, որ Տիգրան Մ.-ն հիվանդանոց է տեղափոխվել կրծքավանդակի թիկնային մակերեսի չթափանցող վերքերով, ձախ գոտկային շրջանի, աջ նախաբազկի ստորին երրորդականի և ձախ արմնկային շրջանի կտրած վերքերով, իսկ Դավիթ Հ.-ն՝ որովայնի առաջնային պատի թափանցող վերքով։

Մինչ բժիշկները պայքարում էին վիրավորների կյանքի համար, ոստիկանության ծառայողները ձեռնարկված օպերատիվ-հետախուզական միջոցառումների արդյունքում պարզել են, որ նույն օրը՝ ժամը 22:00-ի սահմաններում, Ոսկեվազ բնակավայրի վարչական տարածքում գտնվող դաշտամիջյան հատվածում կենցաղային հարցերի շուրջ վիճաբանություն է տեղի ունեցել Արագածոտնի մարզի բնակիչներ 37-ամյա Վահան Ս.-ի և 32-ամյա Սուրեն Պ.-ի միջև։

Այնուհետև նույն օրը՝ ժամը 23:50-ի սահմաններում, վիճաբանությունը շարունակվել է Ոսկեվազ գյուղի 11-րդ փողոցում՝ մի կողմից Վահան Ս.-ի, նրա հոր՝ 66-ամյա Սերյոժա Ս.-ի, հորեղբոր տղաներ 35-ամյա Կարեն Ս.-ի և 32-ամյա Արթուր Ս.-ի, իսկ մյուս կողմից՝ Սուրեն Պ.-ի, նրա մտերիմներ 32-ամյա Դավիթ Հ.-ի, 34-ամյա Վարդան Մ.-ի և 36-ամյա Տիգրան Մ.-ի միջև։

Ըստ ոստիկանությունում ստացված օպերատիվ տվյալների՝ Վահան Ս.-ն է սուր կտրող-ծակող գործիքով մարմնական վնասվածքներ պատճառել Տիգրան Մ.-ին և Դավիթ Հ.-ին։ Ձեռնարկված հետագա միջոցառումների արդյունքում ոստիկանները խուլիգանություն կատարելու կասկածանքով հայտնաբերել, ձերբակալել և ոստիկանություն են տեղափոխել Սերյոժա Ս.-ին, 33-ամյա Հաբեթ Ս.-ին, 35-ամյա Կարեն Ս.-ին, 24-ամյա Սուրեն Մ.-ին, 36-ամյա Արթուր Հ.-ին, 36-ամյա Տիգրան Մ.-ին, 32-ամյա Դավիթ Հ.-ին և Վահան Ս.-ին։

Դեպքի առթիվ կազմված փաստաթղթերը փոխանցվել են Արագածոտնի մարզային քննչական վարչություն, որտեղ նախաձեռնվել է քրեական վարույթ։