ՆԱՏՕ-ի լոգիստիկ հանգույցը պաշտպանելու համար Շվեդիան Լեհաստանի արևելքում Patriot համակարգեր կտեղակայի

Շվեդիան Լեհաստանի արևելքում կտեղակայի Patriot հակահրթիռային պաշտպանության համակարգեր՝ ՆԱՏՕ-ի լոգիստիկ հանգույցը պաշտպանելու համար, որով իրականացվում են Ուկրաինային զենքի մատակարարումները, հայտարարել է Շվեդիայի վարչապետ Ուլֆ Կրիստերսոնը, հաղորդում է Reuters գործակալությունը:

Շվեդիան հակաօդային պաշտպանության առաքելության շրջանակում կփոխարինի Նիդեռլանդներին։ Տեղակայումը կսկսվի դեկտեմբերին, հայտնել են Շվեդիայի կառավարությունում։ Գործողությանը կներգրավվեն Հալմստադից ՀՕՊ ստորաբաժանման շուրջ 100 զինծառայողներ։

Կրիստերսոնը հայտարարել է, որ ինչպես շվեդական Gripen կործանիչների, այնպես էլ Patriot համակարգերի առաքելությունը լինելու է Լեհաստանի տարածքում գտնվող ՆԱՏՕ-ի լոգիստիկ հանգույցի պաշտպանությունը։

«Ինչպես Gripen-ների տեղակայման, այնպես էլ Patriot-ների տեղակայման խնդիրը ... Լեհաստանում՝ օդանավակայանում գտնվող ՆԱՏՕ-ի լոգիստիկ հանգույցը պաշտպանելն է»,- ասել է Շվեդիայի վարչապետը։

Շվեդիան չի հայտնել, թե կոնկրետ քանի Patriot համալիր կուղարկվի Լեհաստան։

Ավելի վաղ՝ անցյալ շաբաթ, Ստոկհոլմը հայտարարել էր Լեհաստան Gripen կործանիչներ ուղարկելու մասին՝ ՆԱՏՕ-ի օդային տարածքի վերահսկման առաքելությանը մասնակցելու համար։ Այդպիսով Շվեդիան կուժեղացնի հակաօդային և օդային պաշտպանության՝ միանգամից երկու բաղադրիչ այն օբյեկտի համար, որն առանցքային նշանակություն ունի Ուկրաինային արևմտյան սպառազինության մատակարարման գործում։

Ստոկհոլմի որոշումն ընդունվել է Լեհաստանի՝ Ռուսաստանի կողմից հնարավոր սպառնալիքի մասին նախազգուշացումների ֆոնին։ Լեհաստանի վարչապետ Դոնալդ Տուսկը սեպտեմբերին, հղում անելով չնշված հետախուզական ծառայություններին, հայտարարել էր, թե Ռուսաստանն իբր Ուկրաինային աջակցող երկրների դեմ անօդաչու թռչող սարքերի և հրթիռների կիրառմամբ հիբրիդային հարձակումներ է ծրագրում։

Մոսկվան բազմիցս հերքել է ՆԱՏՕ-ի երկրների վրա հարձակվելու մտադրությունները։ Ռուսաստանի նախագահ Վլադիմիր Պուտինը անցյալ շաբաթ հայտարարել էր. «Ռուսաստանը մտադիր չէ որևէ մեկի վրա հարձակվել, բայց եթե մեր դեմ ագրեսիա իրականացվի, մենք այլ ընտրություն չենք ունենա, քան պատասխանելը»։