Middle East Eye․ Թուրքիան Սաուդյան Արաբիա սահմանափակ զորակազմ կուղարկի

Թուրքիան նախատեսում է մեծացնել իր ռազմական ներկայությունը Սաուդյան Արաբիայում՝ առաջիկա շաբաթներին թագավորություն ուղարկելով սահմանափակ թվով զինծառայողներ և ռազմական տեխնիկա։ Այս մասին հայտնում է Middle East Eye-ը՝ հղում անելով թուրք պաշտոնյաներին։

Անկարայում հիշեցրել են, որ Թուրքիան 2025 թվականից Սաուդյան Արաբիայում տեղակայում է տեխնիկական խմբեր, հակաօդային պաշտպանության և ռադիոէլեկտրոնային պայքարի միջոցներ՝ թագավորության կենսական նշանակության ենթակառուցվածքները պաշտպանելու նպատակով։

Թուրքիան կարող է Սաուդյան Արաբիա տեխնիկական նպատակներով սահմանափակ զորակազմ ուղարկել՝ 2010 թվականին կնքված երկկողմ համաձայնագրի հիման վրա։ Ռազմական ներկայությունն ընդլայնելու համար անհրաժեշտ է հանրապետության խորհրդարանի թույլտվությունը։ Ըստ հրատարակության՝ ակնկալվում է, որ թուրք օրենսդիրները համապատասխան մանդատը կհաստատեն հոկտեմբերին, որից հետո Սաուդյան Արաբիա կուղարկվեն հատուկ նշանակության ուժերի զինծառայողներ, օդաչուներ և ինքնաթիռներ։

«Մենք չենք նախատեսում մեծ թվով զինծառայողներ ուղարկել և անմիջականորեն միջամտել Եմենում իրավիճակին»,– MEE-ն մեջբերում է թուրք բարձրաստիճան պաշտոնյայի խոսքերը։

Ավելի վաղ հաղորդվել էր, որ Մեքքայի դաշինքի անդամ երկրները՝ Պակիստանը, Սաուդյան Արաբիան և Թուրքիան, որոշել են անհապաղ անցնել համատեղ պաշտպանության պարտավորությունների գործնական իրականացմանը և Սաուդյան Արաբիայի տարածքում ռազմական ուժեր տեղակայել։ Որոշումն ընդունվել է հոկտեմբերի 5-ին Էր-Ռիադում կայացած դաշինքի ռազմաքաղաքական ռազմավարական հանձնաժողովի արտահերթ նիստում։

Հանդիպման արդյունքներով տարածված համատեղ հայտարարության մեջ նշվել էր, որ զորքերի տեղափոխումն իրականացվելու է դաշինքի անդամ երկրների ազգային օրենսդրությանը համապատասխան։

Երեք երկրների միջև Մեքքայի համաձայնագրի ակտիվացման պատճառը Եմենի ապստամբական «Անսար Ալլահ» շարժման հութիների կողմից Սաուդյան Արաբիայի ուղղությամբ իրականացվող հաճախակի դարձած հարձակումներն են։