Հնդկաստանն ու Հայաստանը քննարկում են «Պինակա» հրթիռների արտադրությունը Հայաստանում

Հայաստանն ու Հնդկաստանը քննարկում են Հայաստանում հնդկական «Pinaka Mk-II» հրթիռների տեղական արտադրության և հավաքման հնարավորությունը։ Այս մասին հայտնում է հնդկական IDRW պարբերականը՝ հղում անելով իր աղբյուրներին։

Ըստ հրապարակման՝ համաձայնության ձեռքբերման դեպքում ծրագիրը կարող է խորացնել Հայաստանի և Հնդկաստանի ռազմարդյունաբերական համագործակցությունն ու ապահովել զինամթերքի ավելի կայուն մատակարարումներ։

Նշվում է, որ Հայաստանի զինված ուժերի սպառազինության մեջ արդեն ներառված են հնդկական արտադրության «Pinaka Mk-II» կառավարվող հրթիռներ, ինչպես նաև «Pinaka Extended Range» չկառավարվող հրթիռներ։

IDRW-ի տվյալներով՝ հնարավոր համագործակցության շրջանակում հնդկական պաշտպանական ընկերությունը կարող է Հայաստանին տրամադրել տեխնոլոգիական աջակցություն, արտադրական փորձ և մասնագետների ուսուցում։ Սկզբնական փուլում հնարավոր է օգտագործվեն հնդկական արտադրության բաղադրիչներ, իսկ հետագայում ավելանա տեղական արտադրության մասնաբաժինը։

Միաժամանակ, ըստ պարբերականի, քննարկումները դեռ նախնական փուլում են։ Արտադրության մոդելը, հրթիռի կոնկրետ տարբերակը և տեխնոլոգիաների փոխանցման պայմանները դեռ վերջնականապես որոշված չեն, իսկ որևէ վերջնական համաձայնագիր դեռ չի հայտարարվել։