Թրամփը հայտարարել է, որ ԶԼՄ-ները Լոս Անջելեսի և Սան Դիեգոյի վրա հարվածների մասին իր խոսքերը համատեքստից կտրել են

ԱՄՆ նախագահ Դոնալդ Թրամփը հայտարարել է, որ ամերիկյան ԶԼՄ-ները միտումնավոր խեղաթյուրել են Լոս Անջելեսի և Սան Դիեգոյի վրա հնարավոր հարվածների մասին իր խոսքերը՝ դրանք ներկայացնելով որպես Իրանին ամերիկյան քաղաքների վրա հարձակվելու կոչ։

«Կեղծ և արհեստական լուրերը փորձում են ասել, թե ես թշնամուն կոչ եմ անում ռմբակոծել Սան Դիեգոն և Լոս Անջելեսը»,- գրել է Թրամփը Truth Social սոցիալական ցանցում։

ԱՄՆ նախագահի ասելով՝ իրականում ինքը խոսում էր Իրանի հետ պատերազմի հետևանքների համեմատական գնի մասին։ Թրամփը պարզաբանել է, որ բենզինի գների ժամանակավոր աճը փոքր գին է այն բանի դիմաց, որպեսզի Իրանը միջուկային զենք չստանա։

«Կարո՞ղ եք պատկերացնել, թե ինչ գին կունենար դա, եթե նրանք ռմբակոծեին Սան Դիեգոն և/կամ Լոս Անջելեսը»,- գրել է Թրամփը։

Ըստ նրա՝ ինքը պարզապես համեմատում էր բենզինի արժեքի կարճաժամկետ բարձրացումը ամերիկյան խոշոր քաղաքների վրա հնարավոր միջուկային հարվածի հետևանքների հետ։

Թրամփի հայտարարության առիթը դարձել էր նրա հոկտեմբերի 5-ի հանրահավաքը Նեբրասկայում։ Խոսելով վառելիքի գների և Իրանի հետ պատերազմի մասին՝ նախագահը հայտարարել էր, որ բենզինի գնի աճն ԱՄՆ անվտանգության համար «փոքր գին» է, որից հետո ասել էր. «Թող նրանք ոչնչացնեն Լոս Անջելեսը։ Թող նրանք ոչնչացնեն Սան Դիեգոն»։ Այս խոսքերը սուր արձագանք էին առաջացրել Կալիֆոռնիայում, ներառյալ՝ նահանգապետ Գևին Նյուսոմի և մի շարք հանրապետականների կողմից։

Դրանից հետո Սպիտակ տունը հայտարարել էր, որ Թրամփն Իրանին չի կոչել հարձակվել ամերիկյան քաղաքների վրա։ Սպիտակ տան հաղորդակցությունների տնօրեն Սթիվեն Չունգն ասել էր, որ նախագահը նկատի ուներ այն վտանգը, որը կներկայացներ միջուկային զենք ստացած Իրանը. ըստ նրա՝ առանց ԱՄՆ գործողությունների՝ ամերիկյան քաղաքները կարող էին հայտնվել հարվածի տակ։

Ինքը՝ Թրամփը, հոկտեմբերի 8-ին կրկին վերադարձել է այս թեմային՝ հայտարարելով, որ հենց նման սցենարի կանխումն էր Իրանի հետ պատերազմի սկսման պատճառներից մեկը։ Նա կրկին հիշատակել է Սան Դիեգոն և Լոս Անջելեսը և ասել, որ ԱՄՆ-ն չի թույլ տա նման հարված հասցնել իր քաղաքներին։