iPhone 18 Pro-ի պահանջարկը նվազել է․ Apple-ը կրճատում է արտադրությունը

Apple-ը հանձնարարել է կրճատել iPhone 18 Pro և iPhone 18 Pro Max սմարթֆոնների բաղադրիչների արտադրությունը՝ այս մոդելների նկատմամբ պահանջարկի նվազման պատճառով։ Այս մասին հաղորդում է Nikkei Asia-ն՝ հղում անելով իր աղբյուրներին։

Հրապարակման համաձայն՝ պրեմիում մոդելների պահանջարկը նվազել է 15-20%-ով։ Դրա պատճառներից մեկը կարող է լինել հիշողության մոդուլների գների կտրուկ աճը, որը բարձրացնում է սմարթֆոնների ինքնարժեքը և նվազեցնում թանկարժեք սարքերի նկատմամբ սպառողների հետաքրքրությունը։

Աղբյուրներից մեկի կարծիքով՝ պահանջարկի անկման վրա կարող է ազդել նաև Apple-ի նոր մոդելների թողարկման ժամանակացույցի փոփոխությունը։ Այս տարի ընկերությունն առաջնահերթություն է տվել ավելի թանկ մոդելներին, իսկ iPhone 18-ի բազային տարբերակի և iPhone Air-ի նոր սերնդի ներկայացումը հետաձգվել է մինչև գարուն։

Միևնույն ժամանակ, աղբյուրները նշում են, որ դեռ դժվար է կանխատեսել՝ ինչպես կզարգանա իրավիճակը առաջիկա ամիսներին։