Զապորոժիեում ավիահարվածների հետևանքով 8 զոհ կա, 16 մարդ վիրավորվել է․ նրանց թվում երեխաներ կան

Ուկրաինայի Զապորոժիե քաղաքում հոկտեմբերի 10-ի առավոտյան ավիահարվածների հետևանքով զոհվել է 8 մարդ, այդ թվում՝ 3 երեխա, ևս 16-ը վիրավորվել են։ Այս մասին հայտնել է Զապորոժիեի մարզի պաշտպանության խորհրդի համանախագահ Իվան Ֆեդորովը՝ տեղեկությունը հրապարակելով իր Telegram-ալիքում։

Նրա խոսքով՝ վիրավորներից երեքը երեխաներ են, իսկ երկու տուժածի վիճակը ծանր է։ Եվս 12 մարդու ճակատագիրն անհայտ է։ Տեղում շարունակվում են որոնողափրկարարական աշխատանքները։

Տեղական իշխանությունների տվյալներով՝ ռուսական ուժերը քաղաքին հարվածել են կառավարվող ավիառումբերով։ Վնասվել է առնվազն 26 բնակելի շենք՝ 23 բազմաբնակարան և երեք առանձնատուն։ Բազմաբնակարան շենքերից մեկի մուտքի հատվածում փլուզումներ են տեղի ունեցել։

Ուկրաինայի ռազմաօդային ուժերի հաղորդմամբ՝ գիշերային հարձակման ընթացքում ռուսական կողմը կիրառել է 160 անօդաչու թռչող սարք, որոնցից 110-ը՝ ռեակտիվ շարժիչով։

Իր հերթին՝ Ռուսաստանի պաշտպանության նախարարությունը հայտնել է, որ նախորդ գիշերվա ընթացքում ՀՕՊ միջոցները որսացել և ոչնչացրել են 560 ուկրաինական անօդաչու թռչող սարք՝ Ռուսաստանի մի շարք մարզերի, Մոսկվայի տարածաշրջանի, Ղրիմի, ինչպես նաև Ազովի և Սև ծովերի վրա։

ՌԴ ՊՆ-ն նաև հայտարարել է Ուկրաինայի նավահանգստային ենթակառուցվածքներին և նավերին անօդաչուներով հարվածները շարունակելու մասին՝ պնդելով, որ Օդեսայի նավահանգստի մոտ հարվածել է ռազմական բեռ տեղափոխող բեռնանավի։