FlyDubai-ի երկրորդ օդաչուն ծրագրել էր ինքնաթիռն ուղղել դեպի Իսրայելի օդանավակայանի տերմինալ․ ԱՄԷ դատախազություն

FlyDubai ավիաընկերության երկրորդ օդաչուն, որը սեպտեմբերի 30-ին Թել Ավիվ թռչող ինքնաթիռում կացնով հարձակվել էր օդանավապետի վրա, մտադիր է եղել զավթել օդանավի կառավարումը և այն ուղղել դեպի Իսրայելի գլխավոր միջազգային օդանավակայանի ուղևորային տերմինալ։ Այս մասին, Associated Press-ի փոխանցմամբ, հոկտեմբերի 9-ին հայտնել է Արաբական Միացյալ Էմիրությունների դատախազությունը։

ԱՄԷ գլխավոր դատախազության տվյալներով՝ Օմանի քաղաքացի հանդիսացող կասկածյալը գործել է հնարավորինս շատ մարդկանց զոհվելու նպատակով։ Ինքնաթիռում եղել է 174 ուղևոր, որոնց մեծ մասը Իսրայելի քաղաքացիներ են եղել։

Պետական WAM գործակալության տարածած հայտարարության համաձայն՝ կասկածյալը ոգեշնչվել է 2001 թվականի սեպտեմբերի 11-ին ԱՄՆ-ում տեղի ունեցած ահաբեկչություններից։ Դատախազության տվյալներով՝ նա Դուբայից Թել Ավիվ կատարած նախորդ երկու չվերթերն օգտագործել է թռիչքուղին և նշանակման օդանավակայանը ուսումնասիրելու համար։ Միևնույն ժամանակ, ավիաընկերությունում անցկացված անվտանգության և մասնագիտական ստուգումները նրա մոտ ծայրահեղական հայացքների կամ հարձակման նախապատրաստման նշաններ չեն բացահայտել։

Associated Press-ի հաղորդմամբ՝ կասկածյալը 29-ամյա Համամ ալ-Համամին է։ ԱՄԷ իշխանությունների փոխանցմամբ՝ նա ընդունել է մեղքը և հայտնել, որ գործել է միայնակ։ Քննության վարկածով՝ ծայրահեղական գաղափարների ազդեցության տակ նա կարող էր հայտնվել Ավստրալիայում՝ 2017 թվականին Մելբուռնի թագավորական տեխնոլոգիական ինստիտուտում սովորելու տարիներին։

Միջադեպը տեղի է ունեցել Հորդանանի և Սաուդյան Արաբիայի օդային տարածքում։ Երկրորդ օդաչուն օդաչուների խցիկում վթարային կացնով հարվածել է օդանավապետ Սմիթ Մաչարիին։ Չնայած ստացած վնասվածքներին՝ օդանավապետին հաջողվել է դուրս գալ խցիկից և ահազանգել անձնակազմին ու ուղևորներին։

Ուղևորները վնասազերծել են հարձակվողին։ Միջադեպի ընթացքում ինքնաթիռը մեկ րոպեից էլ պակաս ժամանակում կորցրել է շուրջ 4,3–4,9 հազար մետր բարձրություն։ Երկու պահեստային օդաչուները ստանձնել են կառավարումը և օդանավը վթարային վայրէջքի են ենթարկել Սաուդյան Արաբիայի Թաբուկ քաղաքի օդանավակայանում։

ԱՄԷ դատախազությունը քննությունը վերահսկողության տակ է վերցրել դեպքից անմիջապես հետո։ Հոկտեմբերի 9-ին հրապարակված հայտարարությունը միջադեպի վերաբերյալ պաշտոնական ամենամանրամասն հաղորդագրությունն է։