Քադիրովը Բաքվում Ալիևին շնորհավորել է «Ղարաբաղյան հարցի լուծման» կապակցությամբ

Ադրբեջանի նախագահ Իլհամ Ալիևը հանդիպել է Չեչնիայի ղեկավար Ռամզան Քադիրովի հետ։ Կողմերը քննարկել են Ադրբեջանի և Չեչնիայի միջև հարաբերությունները, ինչպես նաև տարբեր ոլորտներում համագործակցության հեռանկարները, հաղորդվել է Ադրբեջանի նախագահի պաշտոնական կայքում։

Ալիևը նշել է, որ ադրբեջանցի և չեչեն ժողովուրդներին կապում է «դարավոր պատմությունը»։

«Եվ այսօր մենք ցուցաբերում ենք համերաշխություն, բարեկամություն, համագործակցություն», — հայտարարել է Ադրբեջանի նախագահը։

Նա նաև նշել է Չեչնիայի ձեռքբերումները կայունության և անվտանգության ապահովման, ինչպես նաև սոցիալ-տնտեսական զարգացման ոլորտում։ Ալիևն ընդգծել է, որ Քադիրովին միշտ ուրախ են տեսնել Ադրբեջանում։

Չեչնիայի ղեկավարը, իր հերթին, հայտարարել է, որ Ադրբեջանին և Չեչնիային կապում են բազմաթիվ պատմական և բարեկամական կապեր։ Նա նաև ցավակցություն է հայտնել 2024 թվականի դեկտեմբերին Բաքու — Գրոզնի երթուղու ինքնաթիռի կործանման կապակցությամբ։

«Սա մեր ընդհանուր ցավն է։ Մենք անկեղծորեն կիսում ենք եղբայրական ադրբեջանցի ժողովրդի վիշտը և աղոթում ենք զոհվածների հոգիների համար», — ասել է Քադիրովը։

Բացի այդ, Չեչնիայի ղեկավարը Ադրբեջանին շնորհավորել է «Ղարաբաղյան հարցի լուծման» կապակցությամբ։

Հանդիպման ընթացքում կողմերը քննարկել են տարբեր ոլորտներում Ադրբեջանի և Չեչնիայի միջև փոխգործակցության հետագա զարգացման հարցը։