Իրանը երկրի սահմանների երկայնքով տեղակայել է ավելի քան 50 մարտական և օժանդակ ստորաբաժանում

Իրանը երկրի անվտանգության ապահովման համար պետական սահմանների երկայնքով տեղակայել է ցամաքային զորքերի ավելի քան 50 մարտական և օժանդակ ստորաբաժանում։ Այս մասին հայտնել է Իրանի բանակի ցամաքային զորքերի հրամանատար, բրիգադի գեներալ Ալի Ջահանշահին, փոխանցել է Mehr-ը։

Նրա խոսքով՝ ստորաբաժանումները տեղակայված են սահմանի ընդարձակ հատվածում՝ հյուսիսարևմտյան շրջաններից մինչև երկրի հարավ-արևմուտք, ինչպես նաև արևելյան շրջաններում և հարավ-արևելքում՝ Մաքրանի ափամերձ գոտու երկայնքով։

Ջահանշահին նշել է, որ իրանական ցամաքային զորքերը սահմանամերձ շրջաններում ներկայություն էին պահպանում նաև ԱՄՆ-ի և Իսրայելի հետ պատերազմի սկսվելուց առաջ։ Նրա խոսքով՝ հիմնական ուժերը կենտրոնացված են երկրի հյուսիսարևմտյան, արևմտյան, հարավարևմտյան, արևելյան, հյուսիսարևելյան և հարավարևելյան սահմանագծերում։

Գեներալն ընդգծել է, որ ԱՄՆ-ի և Իսրայելի հետ 12-օրյա պատերազմից հետո բանակը վերանայել է օպերատիվ պլանները, փոխել է ստորաբաժանումների մարտական կառուցվածքն ու կազմակերպումը, ինչպես նաև առաջնահերթ ուշադրություն է դարձրել զորքերի համալրմանը ժամանակակից սպառազինությամբ։

«Մենք վերանայել ենք օպերատիվ պլանները, փոխել մարտական կառուցվածքն ու կազմակերպումը, ինչպես նաև առաջնահերթություն ենք տվել ստորաբաժանումները նոր տեսակների սպառազինությամբ համալրելուն, որոնք ունեն բարձր ճշգրտությամբ խոցման հնարավորություններ, ինտելեկտուալ համակարգեր և ցանցային տեխնոլոգիաներ», — հայտնել է Ջահանշահին։

Նրա խոսքով՝ ձեռնարկված միջոցները թույլ են տվել ցամաքային զորքերին անհրաժեշտ մարտական ոգով և պատրաստականությամբ դիմավորել երրորդ պատերազմի սկիզբը, որը Թեհրանն անվանում է «Ռամադանի պատերազմ»։

Տեղակայված ստորաբաժանումների թվում գեներալը նշել է հատուկ նշանակության ուժերը, արագ արձագանքման և հատուկ գործողությունների ստորաբաժանումները, մեքենայացված զորամասերը և հրետանին։ Նրա խոսքով՝ դրանք ապահովված են անհրաժեշտ աջակցությամբ։

Սեպտեմբերի 20-ին Ջահանշահին արդեն հայտարարել էր, որ իրանական ցամաքային զորքերը պահպանում են արդյունավետ ներկայություն սահմաններին և պատրաստ են դիմակայել սպառնալիքներին։