Վրաստանում ղազախ վարորդին դատապարտել են 16 տարվա ազատազրկման՝ ցավազրկող դեղամիջոցի պատճառով

Ղազախստանցի հեռագնա վարորդ Իվան Չեկուլաևը Վրաստանում 16 տարվա ազատազրկման է դատապարտվել այն բանից հետո, երբ մաքսային զննման ընթացքում նրա դեղատուփում Tilidin տեսակի ուժեղ ցավազրկող միջոց են հայտնաբերել։ Դատապարտյալի կինը՝ Յուլիան, ով ամիսներ շարունակ պայքարում էր ամուսնուն ազատ արձակելու համար, մտադիր է բողոքարկել դատավճիռը, հայտնում է Qumash.kz-ը։

Չեկուլաևին ձերբակալել էին ապրիլին Փոթիի նավահանգստում, երբ նա վերադառնում էր Գերմանիայից։ Կնոջ խոսքով՝ ամուսինն այնտեղ էր մեկնել բժշկական հետազոտության՝ ողնաշարի հետ կապված լուրջ խնդիրների պատճառով։ Յուլիայի խոսքով՝ նրա մոտ ողնաշարի չորս միջողնային ճողվածք կա, որոնք սաստիկ ցավեր են առաջացնում։

Զննման ընթացքում մաքսավորները վարորդի մոտ հայտնաբերել են Tilidin՝ ուժեղ ցավազրկող դեղամիջոց, որը Վրաստանում դասվում է վերահսկվող նյութերի շարքին։ Կնոջ պնդմամբ՝ դեղը Իվանին նշանակել էր գերմանացի բժիշկը, սակայն տղամարդը դեղատոմսն իր մոտ չի ունեցել։

Չեկուլաևի նկատմամբ քրեական գործ է հարուցվել Վրաստանի քրեական օրենսգրքի 262-րդ հոդվածի 1-ին մասով, որը պատասխանատվություն է նախատեսում առանց իրացման նպատակի թմրամիջոցների և հոգեմետ նյութերի ապօրինի պահման կամ փոխադրման համար։ Ավելի վաղ հաղորդվում էր, որ նրան սպառնում է մինչև 15 տարվա ազատազրկում, սակայն դատարանը սահմանել է 16 տարվա ազատազրկում։

Ձերբակալությունից հետո Յուլիան ամիսներ շարունակ փորձում էր հասնել ամուսնու ազատ արձակմանը։ Ընտանիքն ապրում է Շչուչինսկում, ամուսիններն ունեն երկու անչափահաս դուստր։ Կինը պնդում է, որ դեղամիջոցը Իվանին անհրաժեշտ է եղել բժշկական ցուցումներով, և նա մտադրություն չի ունեցել այն օգտագործել ապօրինի նպատակներով։

Ղազախստանի արտաքին գործերի նախարարությունն ավելի վաղ հայտնել էր, որ իրավիճակը գտնվում է գերատեսչության վերահսկողության տակ, իսկ Վրաստանում ղազախ դիվանագետները ձերբակալվածին ցուցաբերում են հյուպատոսական-իրավական աջակցություն։

Դատավճիռն օրինական ուժի մեջ դեռ չի մտել։ Պաշտպանական կողմն ուղիղ մեկ ամիս ժամանակ ունի վերաքննիչ բողոք ներկայացնելու համար, և Յուլիան մտադիր է օգտվել այդ հնարավորությունից։