Էր Ռիադի օդանավակայանի վրա հարձակման հետևանքով 12 մարդ է զոհվել, ավելի քան 300-ը՝ վիրավորվել

Սաուդյան Արաբիայի մայրաքաղաք Էր Ռիադի թագավոր Խալիդի անվան միջազգային օդանավակայանի վրա հարձակման հետևանքով առնվազն 12 մարդ է զոհվել, ևս 309-ը՝ վիրավորվել։

Այս մասին հոկտեմբերի 11-ին հայտնել է Սաուդյան Արաբիայի քաղաքացիական ավիացիայի վարչությունը։

AFP գործակալության փոխանցմամբ՝ դիվանագիտական աղբյուրը հարձակման պատասխանատվությունը վերագրել է եմենյան հուսիներին, որոնք, ըստ հաղորդագրության, հրթիռ են արձակել օդանավակայանի ուղղությամբ։

Զոհերի թվում են Սաուդյան Արաբիայի չորս, Բանգլադեշի երկու, ինչպես նաև ԱՄՆ-ի, Եգիպտոսի, Հորդանանի, Սիրիայի, Պաղեստինի և Սուդանի մեկական քաղաքացի։ Վիրավորներից մի քանիսի վիճակը գնահատվում է ծանր։

Reuters-ի տվյալներով՝ սա մեկ շաբաթվա ընթացքում օդանավակայանի վրա իրականացված արդեն երրորդ հարձակումն է։ Նախորդ երկու հարձակումների հետևանքով չորս մարդ էր զոհվել, իսկ Սաուդյան Արաբիայի առևտրային ինքնաթիռը լուրջ վնասներ էր կրել։

Աղբյուրների փոխանցմամբ՝ հարձակումից հետո հիվանդանոցները գերծանրաբեռնված են եղել։ Վիրավորներին տեղափոխել են շտապօգնության մեքենաներով և ուղղաթիռներով։

Նշվում է, որ հարձակման վերաբերյալ նախազգուշացում չի եղել, իսկ Սաուդյան Արաբիայի վտանգների մասին ծանուցման համակարգը չի գործել։