Պերուում քաղաքապետի ընտրություններում հաղթել է Հիտլերը

Պերուի Անդերում գտնվող Կերոպալկա շրջանի քաղաքապետի ընտրություններում հաղթել է Հիտլեր Մուսոլինի Սիմեոն Ֆլորեսը։ Այս մասին, հղում անելով Պերուի ընտրական գործընթացների ազգային գրասենյակի (ONPE) տվյալներին, հայտնում է Peru21-ը։

Ձայների 100%-ի հաշվարկից հետո պարզ է դարձել, որ ձախ կենտրոնամետ «Ahora Nación» կուսակցության ներկայացուցիչը ստացել է 229 ձայն՝ ընդհանուրի 34.54%-ը։

Երկրորդ տեղում աջակողմյան «Renovación Popular Perú» կուսակցության թեկնածու Գասպար Բենիլդե Օսորիո Սամբրանոն է՝ 204 ձայնով։ Ընտրություններին մասնակցել է 700-ից մի փոքր ավելի մարդ։

Ըստ թեկնածուի տվյալների՝ Սիմեոն Ֆլորեսը ծնվել է Ուանուկո նահանգում՝ Պերուի կենտրոնական շրջանում, մայրաքաղաք Լիմայից մոտ 360 կմ հեռավորության վրա։

Պարբերականը նաև հիշեցնում է, որ 2018 թվականին Յունգար քաղաքի քաղաքապետ էր ընտրվել Հիտլեր Գեսկլին Ալբա Սանչեսը։ Նա հաղթել էր Լենին Վլադիմիր Ռոդրիգես Վալվերդեին։ Ալբա Սանչեսի նախընտրական քարոզարշավն անցել էր «Ես լավ Հիտլերն եմ» կարգախոսով։