«Սայմոն» փոթորիկը հարվածել է Մեքսիկայի խաղաղօվկիանոսյան ափին․ սպասվում են ջրհեղեղներ և սողանքներ

Չորրորդ կարգի «Սայմոն» փոթորիկը հարվածել է Մեքսիկայի խաղաղօվկիանոսյան ափին, հայտնում է Associated Press-ը։

Դրա էպիկենտրոնը շարժվում է ափի երկայնքով, սակայն առայժմ պարզ չէ՝ արդյոք փոթորիկը ցամաք դուրս կգա, թե ոչ։ Քամու արագությունը հասնում է 240 կմ/ժ-ի, իսկ տեղատարափ անձրևները առափնյա բնակավայրերին սպառնում են ջրհեղեղներով և սողանքներով։

ԱՄՆ-ի Փոթորիկների ազգային կենտրոնի տվյալներով, կիրակի առավոտյան «Սայմոնի» կենտրոնը գտնվում էր մոտ 175 կմ հարավարևելք Կաբո Կորիենտես հրվանդանից և շարժվում էր հյուսիս-հյուսիսարևմուտք՝ մոտ 9 կմ/ժ արագությամբ։

Կենտրոնի մասնագետ Ֆիլիպ Պապենը կարծում է, որ մայրցամաքային Մեքսիկայի արևմտյան ծայրամասում գտնվող Կաբո Կորիենտես հրվանդանի շրջանը ամենահավանականն է, որ կկրի տարերքի ուղիղ հարվածը։

«Այս առավոտ «Սայմոնը» գտնվում է Մեքսիկայի ափերին շատ մոտ», — ասել է Պապենը Associated Press-ին տված հարցազրույցում։

Ըստ նրա, երկրի կենտրոնա-արևմտյան ափին, որտեղ գործում է փոթորկի նախազգուշացումը, սպասվում են կործանարար քամիներ և ջրի վտանգավոր փոթորկային բարձրացում։ Հորդառատ տեղումները կարող են առաջացնել կյանքին սպառնացող ջրհեղեղներ և սողանքներ, հատկապես լեռնային շրջաններում։

Մեքսիկայի հարավարևմուտքի որոշ շրջաններում կանխատեսվում է 250-ից 500 մմ տեղումներ, իսկ Միչոական, Կոլիմա և Խալիսկո նահանգների առանձին հատվածներում դրանց քանակը կարող է հասնել 760 մմ-ի։

Առանձնահատուկ մտահոգություն է առաջացնում Պուերտո Վալյարտայի շրջանի իրավիճակը՝ հայտնի հանգստավայրը, որը հաճախ այցելում են ԱՄՆ-ից զբոսաշրջիկները։ Բացի հյուրանոցային գոտիներից, տարերքը սպառնում է նաև մոտակայքում գտնվող բնակավայրերին, որտեղ տները կարող են չդիմանալ ուժեղ քամիներին և հորդառատ անձրևներին։

Խալիսկո նահանգի իշխանությունները ուրբաթ և երկուշաբթի դադարեցրել են դասերը 22 ափամերձ մունիցիպալիտետների դպրոցներում։ Սկսվել է նաև վտանգավոր շրջաններից բնակիչների տարհանումը։ Զբոսաշրջության ոլորտի ներկայացուցիչներին կոչ է արվել ապահովել աշխատակիցների և հանգստացողների տեղավորումը ապաստարաններում և անվտանգ գոտիներում։

Շաբաթ օրը՝ եղանակի վատթարացման նախօրեին, Պուերտո Վալյարտայի խանութները, հյուրանոցները և այլ ձեռնարկություններ մեխում էին իրենց պատուհանները։ Մեքսիկայի ռազմածովային ուժերը մարդկանց տարհանել են վտանգավոր շրջաններից. դրվագներից մեկում ափ է տեղափոխվել մոտ 80 մարդ։

Օդերևութաբանները նաև նախազգուշացրել են ջրի վտանգավոր փոթորկային բարձրացման և խոշոր կործանարար ալիքների մասին ափամերձ գոտում՝ փոթորկի ենթադրյալ ցամաք դուրս գալու վայրի մոտակայքում։