ԱՄՆ վեց սենատորներ Թրամփին մեղադրել են օրենքը խախտելու մեջ՝ Ռուսաստանից դիզվառելիք գնելու ծրագրի պատճառով

ԱՄՆ-ի Հանրապետական և Դեմոկրատական կուսակցություններից վեց սենատորներ կոչ են արել նախագահ Դոնալդ Թրամփի վարչակազմին անհապաղ հրաժարվել Ռուսաստանից դիզելային վառելիք գնելու ծրագրից, հայտնում է Associated Press-ը։

Նրանց կարծիքով, նման մատակարարումները կհակասեն ամերիկյան օրենսդրությանը և ֆինանսական աջակցություն կապահովեն Մոսկվային՝ Ուկրաինայի դեմ շարունակվող պատերազմի ֆոնին։

Կիրակի հրապարակված համատեղ հայտարարության մեջ օրենսդիրներն ընդգծել են, որ Ռուսաստանը «շարունակում է սպանել Ուկրաինայի խաղաղ բնակիչներին», և կոչ են արել Սպիտակ տանը վերանայել որոշումը։ Նրանք նշել են, որ վարչակազմը չի խորհրդակցել Կոնգրեսի հետ և չի ներկայացրել օրենքով նախատեսված իր գործողությունների հիմնավորումը։

Ռուսաստանյան դիզվառելիքի մատակարարումների շուրջ պայմանավորվելու մտադրության մասին Թրամփը հայտարարել էր ուրբաթ՝ Ռուսաստանի նախագահ Վլադիմիր Պուտինի հետ հեռախոսազրույցից հետո։ Ըստ ամերիկացի առաջնորդի, Ռուսաստանն անմիջապես կմատակարարի ավելի քան 300 հազար տոննա վառելիք ԱՄՆ-ի և այլ երկրների շուկաներ։ Նոյեմբերին սպասվում է ևս 500 հազար տոննա, այնուհետև՝ 1 մլն տոննա, իսկ ավելի ուշ՝ լրացուցիչ 3 մլն տոննա։

Գործարքի դեմ հայտարարությունը ստորագրել են չորս հանրապետականներ՝ Սյուզան Քոլինզը, Լիզա Մուրկովսկին, Թոմ Թիլիսը և Ջոն Քերթիսը, ինչպես նաև երկու դեմոկրատներ՝ Ջին Շահինը և Ռիչարդ Բլյումենթալը։

Թիլիսը կիրակի NBC-ի եթերում հայտարարել է, որ ծրագրի իրականացումը կարող է հարց բարձրացնել նախագահի կողմից օրենքի պահպանման վերաբերյալ։ Նա ընդգծել է, որ Ռուսաստանը ագրեսոր է և կարող է վերջ տալ պատերազմին՝ դուրս բերելով զորքերը օկուպացված տարածքներից։

Սենատորները հիշեցրել են, որ 2022 թվականին Կոնգրեսն արգելել էր ռուսաստանյան էներգակիրների ներմուծումը, որպեսզի թույլ չտա պատերազմի ֆինանսավորումը ամերիկյան գնումների հաշվին։ Բացի այդ, մի քանի շաբաթ առաջ օրենսդիրներն ընդունել էին օրենք, որը նախատեսում է զգալի մաքսատուրքերի սահմանում ռուսաստանյան նավթի և բնական գազի խոշորագույն գնորդների դեմ՝ որոշ երկրների համար առանձին բացառություններով։

Միևնույն ժամանակ հանրապետական Ջոն Բարասոն հայտարարել է, որ Թրամփը ձգտում է նվազեցնել ամերիկացիների էներգետիկ ծախսերը և ստիպված է դժվար որոշումներ ընդունել։ Միաժամանակ սենատորը կոչ է արել ԱՄՆ նախագահին օգտագործել օրենքով նախատեսված պատժամիջոցային միջոցները որպես Պուտինի վրա ճնշման լծակ՝ երկարաժամկետ կարգավորման հասնելու համար։