Սեուտայում Իսպանիայի թագավորի և թագուհու այցից առաջ վերացվել է միգրանտների վերջին ճամբարը

Իսպանական անկլավ Սեուտայում Գուանո լողափում վերացվել է միգրանտների վերջին ճամբարը։ Գործողությունը սկսվել է շաբաթ օրը՝ Իսպանիայի թագավոր Ֆելիպե VI-ի և թագուհի Լետիսիայի այցից երկու օր առաջ։ Ըստ գնահատականների, ճամբարում մնացել էր մոտ 400 մարդ, հայտնում է Euronews-ը։

Տեղական ժամանակով մոտ 08:00-ին գործողությանը ներգրավվել են ազգային ոստիկանության աշխատակիցներ, անկարգությունների դեմ պայքարի ստորաբաժանումներ, միգրացիոն ծառայություններ, Քաղաքացիական գվարդիան և տեղական ոստիկանությունը։ Միգրանտներին հավաքել և ավտոբուսներով տեղափոխել են օտարերկրացիների ժամանակավոր տեղավորման կենտրոն (CATE), որտեղ գրանցել են նրանց տվյալները։ Դրանից հետո մարդկանց պետք է բաշխեն պետական տեղավորման կենտրոնների միջև։ Միգրանտների մի մասը լքել էր ճամբարը մինչև ոստիկանության ժամանումը և ապաստան գտել մոտակա բլուրներում։

Հայտնաբերված անչափահասներին առանձնացրել են մեծահասակներից։ Նրանց նախատեսում են տեղափոխել հատուկ հաստատություններ։ Որոշ երեխաներ պահել են պաստառներ՝ խնդրելով իրենց ուղարկել անչափահասների կենտրոն։

Գործողության ավարտից հետո կոմունալ ծառայությունները սկսել են տարածքի մաքրումը, որտեղ մնացել էին վրաններ, աղբ և այլ թափոններ։ Լողափին հասցված բնապահպանական վնասը պետք է գնահատվի առանձին։ Ճամբարը բազմիցս դարձել էր հակամարտությունների և գողությունների վայր, դրա հետ նաև կապում են երկու մարդու մահը։

Ֆելիպե VI-ը և Լետիսիան պետք է այցելեն Սեուտա հոկտեմբերի 13-ին։ Նրանք կմասնակցեն միջոցառման՝ ի հիշատակ այն մարդկանց, որոնք զոհվել են ծովում Տարախալի մոտ սահմանը զանգվածաբար հատելու փորձի ժամանակ։ Սեուտայում գիշերելուց հետո թագավորը և թագուհին կմեկնեն Մելիլյա։ Սա կլինի իսպանացի միապետի առաջին գիշերակացը Սեուտայում Ալֆոնսո XIII-ի ժամանակներից ի վեր, որն անկլավ էր այցելել 1904 և 1927 թվականներին։