«Եթե չդիմադրեի, ողջ չէինք մնա». Անի Ավետիսյանը՝ Շաքիի զինված միջադեպի մանրամասների մասին

Շաքիում ադրբեջանցի զինծառայողի կրակոցներից վիրավորված 39-ամյա Անի Ավետիսյանը «Ազատությանն» է պատմել հոկտեմբերի 1-ին իր տանը տեղի ունեցած զինված միջադեպի մանրամասները։

Կնոջ խոսքով՝ տուն հասնելուն պես տեսել է, որ զինված տղամարդը զենքն ուղղել է երեխաների վրա։ Նա հիշում է երեք կրակոց։ Երբ տղամարդը երկրորդ անգամ փորձել է կրակել որդու ուղղությամբ, Անին ձեռքով բռնել է ինքնաձիգը։ Կրակոցի հետևանքով նա կորցրել է ձախ ձեռքի բութ մատը, իսկ մյուս մատները ծանր վնասվել են։ Այնուհետև, չնայած վնասվածքին, կինը դանակով հարվածներ է հասցրել զինծառայողին։ Երրորդ կրակոցը դիպել է նրա ոտքին։

Ավետիսյանի խոսքով՝ եթե ինքը չդիմադրեր, հնարավոր է՝ ինքն ու երեխաները ողջ չմնային։ Կինը նաև նշել է, որ միջադեպի ընթացքում չի հասկացել՝ իր տուն ներխուժած անձն ադրբեջանցի զինծառայող է, քանի որ նա ձայն չի հանել։

Ավետիսյանը դժգոհել է, որ իրավապահները բնակիչներին չեն զգուշացրել Սյունիքում սահմանը հատած ադրբեջանցի զինծառայողի որոնումների մասին։ Ըստ ԱԱԾ-ի՝ ադրբեջանական կողմը հայկական կողմին զինծառայողի մասին տեղեկացրել էր սեպտեմբերի 29-ին, իսկ նա վնասազերծվել էր հոկտեմբերի 1-ին։

Կինը նաև պնդել է, որ ոստիկանները, չնայած ահազանգին, ուշ են հասել դեպքի վայր։ Ավելի վաղ վարչապետ Նիկոլ Փաշինյանը միջադեպն անվանել էր «սովորական կրիմինալ միջադեպ» և հայտարարել, որ ոստիկանություն զանգահարելու դեպքում պետք է սպասել իրավապահների գործողություններին։ Ավետիսյանին դեռ երեք վիրահատություն է սպասվում։

Ադրբեջանցի զինծառայող Նասիմի Մուսաևը կալանավորված է։ Նրան մեղադրանքներ են ներկայացվել, այդ թվում՝ սահմանն ապօրինի հատելու, զենքի գործադրմամբ առողջությանը ծանր վնաս պատճառելու և բնակարանի անձեռնմխելիությունը խախտելու համար։