Չինական մեքենաները Նորվեգիայում զորավարժությունների ժամանակ գրանցել են զինվորների տեղաշարժերն ու գաղտնի կոդերը

Նորվեգիայի զինված ուժերի զինծառայողները սեպտեմբերին Օսլոյի օդանավակայանի պաշտպանության զորավարժությունների ընթացքում հայտնաբերել են, որ վարձակալած չինական ավտոմեքենաները պահպանել են իրենց տեղաշարժերի տեսագրություններն ու ռազմական օբյեկտների մուտքի գաղտնի կոդերը։ Այս մասին հայտնում է նորվեգական Dagens Næringsliv պարբերականը։

Լրատվամիջոցի տվյալներով՝ մեքենաների ներկառուցված տեսախցիկներն ու համակարգերը գրանցել են ոչ միայն զինվորների տեղաշարժերը, այլև այն թվային կոդերը, որոնք նրանք մուտքագրել են ռազմական անցակետերում՝ դարպասներ, դռներ և հատուկ պահպանվող տարածքներ բացելու համար։ Պահպանվել են նաև տեղեկություններ այն մասին, թե ով է նստել մեքենան, ուր է այն գնացել և որքան ժամանակ է մնացել տվյալ վայրում։ Պարբերականի երկու անանուն աղբյուր հաստատել են այս տեղեկությունները։

Նորվեգիայի զինված ուժերը մեքենաները վարձակալել էին Hertz ընկերությունից՝ այլընտրանքային տրանսպորտի սահմանափակ լինելու պատճառով։ Հետաքննության մեջ հիշատակվում են առնվազն երկու Deepal մակնիշի էլեկտրամեքենաներ, որոնք պատկանում են չինական պետական Changan կոնցեռնին։ Նյութում հիշատակվում է նաև Volvo-ն, որի սեփականատերը չինական Geely Group-ն է։

Հրապարակման համաձայն՝ միջադեպը մտահոգություններ է առաջացրել այն մասին, թե ժամանակակից ավտոմեքենաներում հավաքվող տվյալները որքանով կարող են բացահայտել ռազմական տեղաշարժերն ու պաշտպանված օբյեկտների հասանելիության տվյալները։ Սակայն հրապարակված տեղեկությունները ինքնին չեն ապացուցում, որ այդ տվյալները փոխանցվել են Չինաստանի իշխանություններին։