NYT. ԱՄՆ-ն հրաժարվում է զիջումների գնալ Ուկրաինային՝ նավթավերամշակման գործարանների վրա հարձակումները դադարեցնելու պահանջներից հետո

Ամերիկացի բանակցողներ Սթիվեն Ուիթքոֆը և Ջարեդ Քուշները Ուկրաինայի ներկայացուցիչներին հայտնել են, որ նրանք որևէ մտադրություն չունեն որևէ բան առաջարկել ռուսական նավթավերամշակման գործարանների վրա հարձակումներից հրաժարվելու դիմաց, հաղորդում է The New York Times-ը (NYT)՝ հղում անելով իր աղբյուրներին։

Իրենց աղբյուրների համաձայն՝ Ուիթքոֆը և Քուշները ուրբաթ օրը Մայամիում եվրոպական և ուկրաինական պատվիրակությունների հետ բանակցությունների ժամանակ հայտարարել են ԱՄՆ նախագահ Դոնալդ Թրամփի պահանջի մասին՝ դադարեցնել ռուսական նավթավերամշակման գործարանների վրա հարձակումները։

NYT-ի հաղորդմամբ՝ ուկրաինացի ներկայացուցիչներից մեկի հարցին Կիևի համար զիջումների մասին, ամերիկացի բանակցողները պատասխանել են, որ Վաշինգտոնն «արդեն շատ բան է անում Ուկրաինայի համար», ուստի, Վլադիմիր Զելենսկին չպետք է ակնկալի փոխզիջում այս հարցում։

Թերթի աղբյուրները հավելել են, որ Քուշների և Ուիթքոֆի խոսքերը հանդիպմանը ներկաների կողմից ընկալվել են որպես քողարկված սպառնալիք։ Զրույցի ընթացքում ամերիկացի ներկայացուցիչները նշել են, որ Վաշինգտոնն այժմ Կիևին տրամադրում է հետախուզական տվյալներ, որոնք կենսական նշանակություն ունեն Ուկրաինայի զինված ուժերի համար։