Փոթորիկները Մեքսիկայում և ԱՄՆ-ում ջրհեղեղներ են առաջացրել. կան զոհեր

«Սայմոն» փոթորիկը նոր տեղատարափներ և ուժեղ քամի է բերել Մեքսիկայի արևմտյան ափ՝ հետևելով արևադարձային փոթորիկներին, որոնք ափամերձ շրջաններում և հանգստավայրային քաղաքներում ջրհեղեղներ, ավերածություններ էին առաջացրել և մարդկային զոհերի պատճառ դարձել, հաղորդում է Associated Press-ը։

Փրկարարները շարունակում են վերացնել «Ռեյչել» փոթորկի հետևանքները Ստորին Կալիֆոռնիա նահանգում, որտեղ առնվազն չորս մարդ է զոհվել, իսկ մի քանի բնակիչներ համարվում են անհետ կորած։

Երկուշաբթի «Սայմոնը» հասել է Սաֆիր - Սիմփսոնի փոթորիկների սանդղակի երկրորդ կարգին։ Դրա կենտրոնը մնում է ծովում, սակայն արտաքին անձրևային գոտիները ծածկել են բնակավայրերը Սիեռա Մադրե լեռնային համակարգի և Խաղաղ օվկիանոսի միջև, ներառյալ՝ Պուերտո Վալյարտայի մերձակա շրջանները։ Քամու առավելագույն կայուն արագությունը հասել է 155 կմ/ժ-ի։ ԱՄՆ-ի Փոթորիկների դիտարկման ազգային կենտրոնի տվյալներով՝ փոթորիկը կարող էր պահպանել փոթորկի կարգավիճակը մինչև շաբաթվա կեսը։ Հորդառատ տեղումները սպառնում էին կյանքը վտանգող ջրհեղեղներ և սողանքներ առաջացնել, իսկ արևմտյան ափի շրջանում ցամաք դուրս գալը սպասվում էր ավելի ուշ, հնարավոր է՝ ուրբաթ։

Ստորին Կալիֆոռնիայում փրկարարներն ուսումնասիրել են Էնսենադա քաղաքի ջրածածկված շրջանները։ Ջուրը քշել է ավտոմեքենաները, վնասել տները և փակել ճանապարհները։ Որոշ բնակավայրեր սողանքների և վարարած գետերի պատճառով կտրվել են արտաքին աշխարհից։

Տեղի բնակչուհի Յոհանա Նուրիուլուի ասելով՝ ջրհեղեղը սկսվել է գիշերը, երբ հորդառատ անձրևը հանգեցրել էր էլեկտրականության անջատման։ Նա լսել է բարձր աղմուկ, որը նման էր օվկիանոսի ալիքների ձայնին, և նկատել, որ ափերից դուրս եկած առուն հեղեղում է շրջակայքը։

Երկուշաբթի մեքսիկացի զինվորականները ուղղաթիռների օգնությամբ Էնսենադայի ռանչոյից տարհանել են 32 մարդու, որոնց թվում՝ 22 օտարերկրացու և 13 անչափահասի։ Ըստ իշխանությունների՝ այնտեղ եղել են միսիոներներ, ինչպես նաև Գերմանիայի և ԱՄՆ-ի քաղաքացիներ։

Երկուշաբթի երեկոյան իշխանությունները հաստատել են Էնսենադայում չորս մարդու՝ 13-ամյա աղջկա, երկու կնոջ և չորսամյա տղայի մահը։ Եվս վեց մարդ շարունակում են համարվել անհետ կորած՝ չորսը՝ Էնսենադայում, և երկուսը՝ հայր ու որդի, որոնք շաբաթ օրը մեկնել էին ձկնորսության Սան Ֆելիպեի շրջանում։ Ստորին Կալիֆոռնիայի նահանգապետ Մարինա դել Պիլար Ավիլայի տվյալներով՝ տուժածներին օգնելու և տարերքի հետևանքները վերացնելու համար նահանգում ներգրավվել է մոտ 14 հազար դաշնային և տարածաշրջանային աշխատակից։

Ստորին Կալիֆոռնիայից հարավ՝ Գեռերո նահանգում «Սայմոնը» տապալել է ծառեր և էլեկտրահաղորդման գծեր, փակել ճանապարհներ և ջրածածկել տներ, ներառյալ՝ խոշոր նավահանգստային Ակապուլկո քաղաքում։ Նահանգապետ Էվելին Սալգադոն հայտնել է, որ նահանգի մայրաքաղաք Չիլպանսինգոյում 71-ամյա տղամարդ է զոհվել. նրա վրա պատ է փլվել։

Միևնույն ժամանակ «Ռեյչել» արևադարձային փոթորկի մնացորդները ջրհեղեղներ են առաջացրել ԱՄՆ-ի հարավ-արևմուտքում։ Լաս Վեգասում կիրակի առավոտվա դրությամբ եղել են 2,74 սմ տեղումներ՝ կրկնելով հոկտեմբերի համար 1947 թվականին սահմանված օրական ռեկորդը։ Սոցիալական ցանցերում հայտնվել են տեսանյութեր ջրի հոսքերի մասին, որոնք սլանում էին փողոցներով՝ խաղատների և տեսադաշտի անիվի մոտով։ Յուտա նահանգում ջրհեղեղի պատճառով տարհանել են Moab 240 ուլտրամարաթոնի տասնյակ մասնակիցների և կամավորների, որոնք հայտնվել էին թակարդում Քենյոնլենդս և Արչես ազգային պարկերով անցնող երթուղում։

Հարավային Կալիֆոռնիայի ափին ուժեղ ալիքները քանդել են առափնյա զբոսավայրի մի մասը և հարվածել տներին Լոնգ Բիչում՝ որոշ բնակիչների ստիպելով տարհանվել։ Երկուշաբթի երեկոյան Յուտա, Արիզոնա և ԱՄՆ-ի հարավ-արևմուտքի այլ շրջանների մեծ մասում ջրհեղեղների վերաբերյալ նախազգուշացումները չեղարկվել են, թեև հանկարծակի վարարման վտանգը պահպանվում էր։

Բացի դրանից, իշխանությունները շարունակում են վերականգնել էլեկտրամատակարարումը «Իսաիաս» փոթորկից հետո, որն ավելի վաղ հարվածել էր ԱՄՆ-ի հարավ-արևելքին։ Երկուշաբթի երեկոյան Ֆլորիդայում և հարավային Ալաբամայում շուրջ 106 հազար սպառող շարունակում էր մնալ առանց էլեկտրականության։ Սպասվում էր, որ առաջիկա օրերին առավելապես տուժած շրջանների մեծ մասում եղանակը կդառնա ավելի չոր։