Զելենսկին պնդում է, որ «Յանդեքսի» կենտրոններին հարվածներից հետո ռուսական ինտերնետային տրոլներն ավելի քիչ են դարձել․ BBC

Ուկրաինական անօդաչու թռչող սարքերի՝ «Յանդեքսի» տվյալների կենտրոններին հասցրած հարվածներից հետո սոցիալական ցանցերում տարածվել են գրաֆիկներ, որոնց հիման վրա օգտատերերը պնդում են, թե ռուսական ինտերնետային տրոլների և բոտերի ակտիվությունը կտրուկ նվազել է։ Այս մասին գրում է BBC-ի ռուսական ծառայությունը։

Հոկտեմբերի 8-ին կիբերանվտանգության հետազոտող Ջերեմայա Ֆաուլերը X-ում գրել էր ռուսական «բոտային թրաֆիկի» նվազման մասին։ Նրա գրառումը տարածել են նաև Գարի Կասպարովը, ԱՄՆ-ում Ռուսաստանի նախկին դեսպան Մայքլ Մաքֆոլը և այլ հայտնի օգտատերեր։ Հոկտեմբերի 12-ին այդ վարկածին անդրադարձել է նաև Ուկրաինայի նախագահ Վլադիմիր Զելենսկին՝ պնդելով, որ հարվածներից հետո սոցիալական ցանցերում ատելությունը, պառակտումն ու սադրանքները նվազել են։

Սակայն BBC-ի ուսումնասիրության համաձայն՝ կրեմլամետ բոտերի ակտիվության նվազումը հաստատող ապացույցներ չկան։ Հրապարակումներում ամենից հաճախ ներկայացվող Cloudflare Radar-ի գրաֆիկը ցույց է տալիս «Յանդեքսի» կոնկրետ ցանցից եկող ավտոմատ հարցումների նվազումը, ոչ թե սոցիալական ցանցերում քաղաքական բոտերի կամ քարոզչական հաշիվների ակտիվությունը։

Փորձագետները BBC-ին հայտնել են, որ խոսքը, ամենայն հավանականությամբ, «Յանդեքսի» որոնողական ռոբոտների աշխատանքի մասին է, որոնք կայքեր են այցելում և էջերը ինդեքսավորում որոնողական համակարգի համար։ Ռուսաստանի ազդեցության գործողությունները հետևող dTeam հետազոտողների խումբը ևս հայտնել է, որ հարձակումներից հետո իրենց հայտնի ռուսական տրոլների և բոտային ցանցերի ակտիվության էական փոփոխություններ չեն նկատել։