Արտակ Բեգլարյան․ COP17-ում անտեսվում են արցախցիների իրավունքները, մեզ ասում են՝ մոռացեք վերադարձի մասին

«COP17-ը նաև Արցախի ժողովրդի իրավունքների մասին է, քանի որ տարածաշրջանում ամենատուժած բնիկ ժողովուրդը Արցախի հայ ժողովուրդն է»,- Կառավարության շենքի դիմաց՝ COP17-ի անցկացմանն ընդառաջ արցախցիների կազմակերպած բողոքի ակցիայի ժամանակ, հայտարարել է Արցախի Հանրապետության նախկին ՄԻՊ Արտակ Բեգլարյանը։

Նրա խոսքով՝ անընդունելի է, որ նման համաժողով է անցկացվում Հայաստանում, մինչդեռ Արցախի ժողովրդի խնդիրներն ու իրավունքներն ամբողջությամբ անտեսվում են, իսկ արցախցիների նկատմամբ Ադրբեջանի իրականացրած հանցագործությունները, նրա գնահատմամբ, լեգիտիմացվում են։

«Մենք այստեղ ենք՝ բարձրաձայնելու, որ չենք մոռացել մեր իրավունքները և պայքարում ենք մեր վերադարձի իրավունքի, մեր մշակութային ժառանգության ու կենսաբազմազանության պաշտպանության համար, որի անբաժանելի բաղադրիչը հենց բնիկ ժողովուրդն է»,- նշել է Բեգլարյանը։

Նա ընդգծել է, որ COP17-ի օրակարգային հարցերից մեկը բնիկ ժողովուրդների և տեղական համայնքների իրավունքների պաշտպանությունն է, իսկ արցախցիների պարագայում այդ իրավունքների հիմնաքարը վերադարձի իրավունքն է։

«Մինչդեռ ոչ միայն մեր վերադարձի իրավունքը չի պաշտպանվում, այլև հյուրընկալող երկրի իշխանությունները մեզ ասում են՝ մոռացեք ձեր վերադարձի մասին։

Ոչ միայն մեր կենսաբազմազանությունը չի պաշտպանվում, այլև Ադրբեջանը ոչնչացնում է մեր բնությունը, կենսաբազմազանությունն ու մշակութային լանդշաֆտը՝ բնական լանդշաֆտի հետ մեկտեղ։ ՄԱԿ-ի համապատասխան նորմերով մշակութային լանդշաֆտն անբաժանելի է բնական լանդշաֆտից»,- ասել է նա։

Բեգլարյանի համոզմամբ՝ միջազգային հանրության ներկայացուցիչները պետք է հաշվի առնեն, որ տարածաշրջանում խաղաղություն չի հաստատվի, քանի դեռ, նրա գնահատմամբ, Ադրբեջանի իշխանությունները շարունակում են հայատյաց քաղաքականությունն ու ցեղասպանական հանցագործությունները հայ ժողովրդի և մարդկության դեմ։