Լեհաստանը նախատեսում է երեք անգամ բարձրացնել օտարերկրացիների մուտքի համար անհրաժեշտ նվազագույն գումարը

Լեհաստանում նախատեսում են ավելացնել այն նվազագույն գումարը, որը օտարերկրացիները պետք է ունենան՝ երկրում գտնվելու ընթացքում կեցության ծախսերը հոգալու համար, հայտնում է RMF 24-ը։

Ըստ նախագծի՝ մինչև չորս օր տևողությամբ ուղևորության համար կպահանջվի առնվազն 1000 զլոտի՝ ներկայիս 300 զլոտու փոխարեն։

Ավելի երկարատև գտնվելու դեպքում նվազագույն գումարը յուրաքանչյուր օրվա համար կաճի 75 զլոտուց մինչև 300 զլոտի։ Միջոցների առկայությունը հնարավոր կլինի հաստատել նաև արտարժույթի համարժեքով։

Ժամանողների որոշ կատեգորիաների համար ավելի ցածր պահանջներ կսահմանվեն։ Դրանք, մասնավորապես, կվերաբերեն զբոսաշրջային ուղևորությունների մասնակիցներին, երիտասարդական ճամբարներին և մարզական մրցումների մասնակիցներին։ Արտոնյալ պայմանները կտարածվեն նաև նախապես վճարված կեցությամբ, բուժման կամ առողջարան ժամանող, ինչպես նաև սեզոնային աշխատանքի ծրագրերին մասնակցող օտարերկրացիների վրա, եթե աշխատանքի տեղավորումը այցի հիմնական նպատակը չէ։

Այս խմբի համար նվազագույն գումարը կկազմի յուրաքանչյուր օրվա համար 130 զլոտի, սակայն ոչ պակաս, քան 650 զլոտի։ Ներկայում օտարերկրացիների համար բավարար է հաստատել օրական 20 զլոտու առկայություն, ընդ որում ընդհանուր գումարը չի կարող լինել 100 զլոտուց պակաս։

Լեհաստանի ներքին գործերի և վարչակազմի նախարարությունում պարզաբանում են, որ լրացուցիչ միջոցները պետք է ծածկեն այն ծախսերը, որոնք ներառված չեն նախապես վճարված կացարանի, սննդի կամ երկրում գտնվելն ապահովող այլ ծառայությունների արժեքի մեջ։

Փոփոխությունները կանդրադառնան նաև այն օտարերկրացիներին, որոնք Լեհաստան են ժամանում ուսման, դասընթացների և ստաժավորումների անցնելու, գիտական հետազոտությունների կամ փորձակոնստրուկտորական աշխատանքների համար։ Պլանավորված գտնվելու առաջին երկու ամիսների համար նրանց անհրաժեշտ կլինի ունենալ 2020 զլոտի՝ ներկայիս 1270 զլոտու փոխարեն։

Ըստ նախագծի հիմնավորման՝ նոր գումարը համապատասխանում է նվազագույն եկամտի այն մակարդակին, որը Լեհաստանի սոցիալական աջակցության օրենսդրությունում համարվում է բավարար՝ ինքնուրույն տնտեսություն վարող մարդու հիմնական կարիքները հոգալու համար։

Նախաձեռնության հեղինակները նշում են, որ գործող ֆինանսական պահանջները չեն փոխվել 2016 թվականից։ Այդ ընթացքում ապրանքների և ծառայությունների գները աճել են, ուստի նախարարության գնահատմամբ՝ նախկինում սահմանված գումարները կորցրել են իրենց նախկին գնողունակությունը։