Եվրոպական երկրներն ուժեղացնում են անօրինական միգրացիայի դեմ պայքարը. Մելոնի

Իտալիայի վարչապետ Ջորջա Մելոնիի խոսքով՝ անօրինական միգրացիայի դեմ պայքարն ուժեղացնելու համար Եվրոպական միության մի շարք երկրների հետ շարունակվում է նորարարական լուծումների ներդրման ուղղությամբ աշխատանքը։

Մելոնին հայտնել է, որ Դանիայի վարչապետ Մետտե Ֆրեդերիկսենի և Նիդեռլանդների վարչապետ Ռոբ Յեթենի հետ մասնակցել է այս հարցով զբաղվող երկրների հերթական ոչ պաշտոնական հանդիպմանը։

Հանդիպմանը, բացի Իտալիայից, Դանիայից, Նիդեռլանդներից և Եվրահանձնաժողովից, մասնակցել են նաև Ավստրիայի, Բելգիայի, Բուլղարիայի, Խորվաթիայի, Ֆինլանդիայի, Գերմանիայի, Հունաստանի, Լատվիայի, Մալթայի, Լեհաստանի, Սլովենիայի և Շվեդիայի ներկայացուցիչները։

Մելոնիի խոսքով՝ քննարկվել են վերջին ամիսների ընթացքում արձանագրված առաջընթացը և առաջիկա նախաձեռնությունները։ Հատուկ ուշադրություն է դարձվել անօրինական միգրացիոն հոսքերի կանխմանը, միգրանտների՝ քաղաքական կամ այլ նպատակներով օգտագործման դեմ պայքարին և եվրոպական նոր կարգավորումների իրականացմանը։

Անդրադառնալով Սեուտայում վերջին զարգացումներին՝ Իտալիայի վարչապետն ընդգծել է Եվրոպայի արտաքին սահմանների նկատմամբ բարձր զգոնություն պահպանելու անհրաժեշտությունը՝ առաջնահերթ համարելով անօրինական մուտքերի և դրանց հետ կապված անվտանգության ռիսկերի կանխումը։

Մելոնին նաև առաջարկել է նպատակային վերանայել եվրոպական օրենսդրությունը՝ անօրինական միգրանտների ձերբակալման նոր ընթացակարգերն ավելի արդյունավետ դարձնելու համար։