Բեզոսի հիմնադրամը Երևանում հայտարարել է անհետացող տեսակների վերականգնման համար 500 միլիոն դոլար հատկացնելու մասին

Bezos Earth Fund հիմնադրամը մինչև 2030 թվականը լրացուցիչ 500 միլիոն դոլար կներդնի ավելի քան 100 երկրներում անհետացման վտանգի տակ գտնվող տեսակների վերականգնմանն աջակցելու համար։ Այս մասին հոկտեմբերի 16-ին Երևանում՝ COP17-ի շրջանակում անցկացվող «Կենսաբազմազանության առաջնորդներ» գագաթնաժողովի ժամանակ հայտարարել է հիմնադրամի «Լուծումներ բնության համար» ուղղության ղեկավար Քրիստիան Սամպերը։

Նրա խոսքով՝ Հայաստանի և Կոլումբիայի կառավարությունները, ինչպես նաև ևս 14 երկիր մեկնարկում են «Անհետացման վտանգի տակ գտնվող տեսակների վերականգնման գործողությունների կոալիցիան» (CARES)։

Սամպերը նաև հայտարարել է «Տեսակների վերականգնման դոնորների դաշինքի» ստեղծման մասին, որը ձևավորվել է ևս ութ մասնավոր դոնորների հետ համագործակցությամբ։

Նրա խոսքով՝ նախաձեռնությունը կաջակցվի ավելի քան 10 հազար փորձագետների և հարյուրավոր բնապահպանական կազմակերպությունների միավորող ցանցի միջոցով։

Բացի այդ, «Պաշտպանենք մեր մոլորակը» (POP) կոալիցիան, որի կազմում են Bezos Earth Fund-ը և ևս 11 դոնորներ, նախատեսում է մինչև 2026 թվականի վերջը հատկացնել իր խոստացած 5 միլիարդ դոլարից 3.7 միլիարդը։